Svikasíða á Facebook sem ber nafn Keflavíkurflugvallar, Keflavik Airport, hefur vakið talsverða athygli en í færslu á síðunni kemur fram að vöruhús Keflavíkurflugvallar sé að fyllast af týndum farangri.
Til að losa um pláss sé aðeins einn kostur í stöðunni og það er að selja farangurinn á slikk, eða aðeins eina evru. „Til að leggja inn pöntun skaltu fylgja hlekknum,“ segir enn fremur.
Fyrir neðan er svo mynd af miklu magni af töskum og gulu skilti með merki Keflavíkurflugvallar þar sem farangurinn er auglýstur til sölu á eina evru. Vart þarf að taka fram að um svikasíðu er að ræða en þrátt fyrir það virðast einhverjir hafa fallið í gildruna. Til að gera svikin trúverðugri, ef svo má segja, er fjöldi gervimanna búinn að skrifa athugasemdir undir færsluna og lýsa því hvernig það datt í lukkupottinn. Allskonar verðmæti hafi leynst í töskunum, skartgripir og tölvur til dæmis.
Guðjón Helgason, upplýsingafulltrúi Isavia, staðfesti í Morgunútvarpinu á Rás í morgun að grunlausir borgarar hefðu haft samband.
„Fólk hefur haft samband og spurst fyrir um þetta en það er mikilvægt að koma því á framfæri að þarna er um falska síðu á Facebook að ræða. Þetta er síða sem að notar nafn Keflavíkurflugvallar og við erum þessa dagana að reyna að fá þessa síðu tekna niður en það er kannski ekki svo einfalt í rauninni,“ sagði Guðjón.
Bætti hann við að ekki væri hægt að hafa samband við Meta, móðurfyrirtæki Facebook, til að fá síðuna niður og eina leiðin sé að tilkynna síðuna og nógu margir geri það. „Við höfum verið að gera það, starfsfólk okkar og ýmsir aðrir. Hversu margar tilkynningar þarf til að fá síðu tekna niður veit ég ekki,“ sagði hann.
Aðspurður hvernig hljóðið er í fólki þegar það hefur samband sagði Guðjón. „Ég hef heyrt að okkur hafi borist símtöl um hvert það eigi að fara til að ná í tösku. Fólk virðist vera að trúa þessu.“
Guðjón segir að ekki undir nokkrum kringumstæðum myndi Keflavíkurflugvöllur selja farangur sem farþegar hafa gleymt eða ekki vitjað. „Það er eitthvað sem er ekki gert.“
