Stuðningur við styttingu vinnuvikunnar er mun meiri á meðal kvenna en karla. Einnig er yngra fólk mun hrifnari af henni en eldri borgarar.

Þetta kemur fram í nýrri skoðanakönnun sem Prósent gerði.

Í heildina litið er stuðningur við styttingu vinnuvikunnar mjög mikill. 64 prósent eru hlynnt henni en aðeins 19 prósent andvíg. 17 prósent sögðust hvorki vera hlynnt né andvíg.

Athygli vekur að mjög mikill munur er á kynjunum hvað þetta varðar. 73,3 prósent kvenna eru hlynnt styttingu en aðeins 10,1 prósent andvíg. Hjá körlum er þetta mun jafnara. 56,2 prósent styðja styttingu vinnuvikunnar en 27 prósent eru andvíg. Munar þarna um 17 prósentustigum á kynjunum.

Þegar litið er til aldurshópa sést að stuðningur eldri borgarar, 65 ára og eldri, er áberandi minnstur. 50,3 prósent þeirra styðja styttingu vinnuvikunnar en hjá öllum öðrum aldurshópum er stuðningurinn 60 prósent eða meira. 31 prósent eldri borgara eru á móti styttingunni. Fólk á aldrinum 25 til 34 ára er hrifnast af styttingu vinnuvikunnar. 76 prósent styðja hana.

Atvinnurekendur og sjálfstætt starfandi eru minnst hrifnir af styttingu. Þó eru fleiri í þeim hópi fylgjandi en á móti, það er 45,1 prósent á móti 43,7. Launafólk í fullu starfi er hrifnast af styttingu, 69,8 prósent styðja hana.

Könnunin var netkönnun gerð dagana 30. október til 9. nóvember. Úrtakið var 2.250 einstaklingar og svarhlutfallið 51 prósent.