Sigurbergur Sveinsson kaupmaður er látinn. Sigurbergur lést á sunnudaginn 12. nóvember á Landspítalanum níræður að aldri.

Morgunblaðið greinir frá.

Sigurbergur er þekktastur fyrir að stofna og reka stórverslunina Fjarðarkaup í Hafnarfirði. Verslunina stofnaði hann fyrir sléttri hálfri öld, árið 1973, ásamt eiginkonu sinni Ingibjörgu Gísladóttur sem lést árið 2009 og öðrum hjónum, Bjarna Blomsterberg og Valgerði Jónsdóttur. Fram að því hafði Sigurbergur rekið bókhaldsfyrirtæki.

Sigurbergur var einnig einn af stofnendum Golfklúbbsins Keilis í Hafnarfirði árið 1967. Hann var mikill íþróttaáhugamaður og stundaði skák, borðtennis, stangveiði og studdi Hauka í knattspyrnu.

Vakti það athygli þegar Sigurbergur lýsti því að hann væri á móti því að afnema ríkiseinokun á áfengi og heimila sölu áfengis í verslunum. Taldi hann að það yrði til þess að auka á böl þeirra sem glímdu við ofneyslu áfengis.

Sjá einnig:

Eigandi Fjarðarkaupa vill ekki sjá áfengi í verslanir:Þingmenn vilja eitra enn frekar fyrir þjóðinni

Einnig var hann virkur í félagsstarfi, var í Kiwanishreyfingunni og Skógræktarfélagi Hafnarfjarðar. Þá var hann áhugamaður um varðveislu Selárdalskirkju í Arnarfirði en hann ólst upp að Húsum í Selárdal.

Eftirlifandi börn Sigurbergs eru Hjördís, Rósa, Sveinn og Gísli. Aðrir afkomendur eru orðnir 24 og eftirlifandi sambýliskona Sigurbergs er Kolbrún Svavarsdóttir.

Útförin fer fram frá Víðistaðakirkju þann 22. nóvember klukkan 15:00, miðvikudag.