Á laugardag, 18. nóvember, verður stærsta skrautdúfusýning sem haldin hefur verið hér á landi í Fjölskyldu- og húsdýragarðinum í Laugardal. 100 fuglar af 20 tegundum verða sýndir.
Um er að ræða samstarfsverkefni áhugafólks um ræktun skrautdúfna, Fjölskyldu- og húsdýragarðsins og Dýraþjónustu Reykjavíkur.
„Mikið hefur verið flutt til landsins af skrautdúfum undanfarin ár og hafa sumar tegundirnar aldrei verið til hér á landi áður,“ segir í tilkynningu garðsins.
Ræktendur munu sýna sína bestu fugla, það er í kringum 100 fugla af 20 tegundum skrautdúfna. Eru þær í hinum ýmsu litum.
Tveir safnarar munu einnig sýna muni sem tengjast dúfnasporti. Þá verða ljósmyndir sem tengjast skrautdúfnarækt sýndar á risaskjá, sem og myndir af stærri sýningum erlendis.
Sýningin hefst við opnun garðsins klukkan 10:00 í skálanum við veitingahúsið. Sýningunni lýkur klukkan 16:00 en garðurinn lokar klukkutíma seinna. Hefðbundinn aðgangseyrir í garðinn gildir á sýninguna.
