Segja má að ríkt hafi vertíðarstemmning í póstmiðstöðinni um helgina því dag einhleypra, 11. nóvember, bar upp á laugardag í ár. Pakkar streymdu inn á færiböndin og unnið var sleitulaust fram á kvöld við að flokka og koma pökkum til viðskiptavina.
,,Keppnisskapið gerir vart við sig í kringum stóru netsöludagana því okkur er mikið í mun að standa við stóru orðin: Að afhenda pakkana eins fljótt og auðið er,“ segir Halla Garðarsdóttir, forstöðumaður Póstmiðstöðvar í tilkynningu.
,,Pakkarnir ferðast fljótt á milli staða. Pakkaflokkarinn Magni kemur sér vel í svona hamagangi því hann getur flokkað allt að 4000 sendingar á klukkustund. Við fengum hann fyrir tveimur árum og þá varð öll flokkun mun fljótlegri og skilvirkari. Pakkar skila sér hraðar með ýmsum afhendingarleiðum Póstsins um allt land, allt eftir þörfum og óskum hvers og eins.“
Halla segist eiga von á að það verði mikið stuð í nóvember og alveg fram að jólum. ,,Þetta er annasamur tími en jafnframt skemmtilegasti tími ársins hjá Póstinum.“
