Dýraverndarsamtökin Dýrfinna auglýsa eftir fólki sem getur hýst gæludýr (og mögulega íbúa) vegna þess að margir telja sig knúna til að yfirgefa Grindavík núna í miklum jarðskjálftahrinum og vegna yfirvofandi eldgoss.

„Þar sem það virðast þó nokkrir vera að flýja allavega yfir nóttina viljum við hafa þennan möguleika opinn fyrir fólk fyrst fyrirvarinn er lítill og ekki allir með sterkt tengslanet,“ segir Guðfinna Kristinsdóttir hjá samtökunum.

Nánar greinir frá þessu Hundasamfélaginu, opnum Facebook-hópi. Þar segir:

„Nú er óvissuástand vegna mögulegs eldgoss, Grindavíkurvegur farinn í tvennt og fólk að flýja til öryggis.

Mig langar að biðja þá sem geta hýst fólk og/eða gæludýr þeirra tímabundið að kommenta hér undir og taka fram hvaða dýr eru á heimilinu fyrir og hvaða tegundir fólk getur tekið á móti.“