Sigmundur var gestur Nigel Farage, fyrrverandi formanns Breska Sjálfstæðisflokksins og síðar Brexit-flokksins, í þætti hans, Talking Pints, á GB News-sjónvarpsstöðinni í Bretlandi í gærkvöldi.
Í þættinum komu málefni hælisleitenda og flóttamanna til umræðu en mikill fjöldi þeirra fer yfir Ermarsundið, frá Frakklandi til Bretlands, á hverju ári.
Sigmundur sagði að þeir sem væru gómaðir á gúmmíbátum við strendur Bretlands ættu að fá vatnsflösku áður en þeim yrði snúið við.
Breska blaðið Express fjallar um þetta og vísar í ummæli Sigmundar í þættinum.
„Að mínu mati, þegar maður horfir á þetta utan frá, er málið einfalt. Af því að fólk á það til, sérstaklega stjórnmálamenn, að flækja málin allt of mikið,“ sagði hann og hélt áfram:
„Þannig að þegar bátur kemur með ólöglega flóttamenn. Ég myndi taka þá í land, gefa hverjum og einum eina vatnsflösku, og senda þá aftur til Frakklands.“
Sigmundur sagði eðlilegast að Frakkar tækju aftur á móti þessum flóttamönnum, enda komi þeir þaðan.
„Besta lausnin er oftast sú auðveldasta,“ sagði hann og bætti við að af þeirri ástæðu ættu Bretar að hætta að hugsa um Rúanda sem lausn í málefnum flóttamanna.
Greint var frá því í fyrra að bresk stjórnvöld hefðu áætlun um að flytja hælisleitendur sem koma yfir Ermarsundið í flóttamannabúðir í Afríkuríkinu. Óvíst er hvort af þessu verði og er málið fyrir breskum dómstólum þessa dagana.
Hér að neðan má sjá viðtalið við Sigmund. Ummæli hans um flóttamenn koma eftir um átta mínútur.
