Íbúar við Langholtsveg eru orðnir langþreyttir á stórum vinnutækjum og trukki sem hefur verið lagt í stæði í götunni mánuðum saman. Verkið var að langmestu klárað fyrir löngu síðan.
Fimm heimili réðu pípulagningarfyrirtæki til þess að skipta um frárennslislagnir í sumar. Um er að ræða íbúa í einu fjórbýli og einu einbýlishúsi.
Verkinu hefur lítið miðað áfram undanfarið en tækin hafa teppt bílastæðin, bæði fyrir þeim sem búa í umræddum íbúðum og nágrönnum þeirra. Hefur meðal annars verið kvartað til Reykjavíkurborgar yfir þessu.
Að sögn pípulagningarfyrirtækisins er verkinu ekki lokið og því séu vélarnar þarna enn þá. Að sögn eins af verkkaupunum hefur verkið gengið mjög stopullega. Stundum gerist ekkert vikum saman jafn vel þó ýtt hafi verið á eftir verkinu.
Verkið var búið að langstærstum hluta fyrir þó nokkru síðan en enn þá á eftir að ganga frá lausum endum. Þá hefur verið gefin út rukkun þó svo að verkinu sé ekki lokið.
Það eru ekki aðeins vinnuvélar og trukkur sem hafa teppt stæðin í götunni. Um tíma voru líka stórir sand og malarbingar.
Nágranni segir forkastanlegt hversu langan tíma þetta taki. Sjálfur hafi hann keypt stærra verk, það er ný frárennslisrör, auk þess að láta leggja dren í kringum sitt hús og skipta um neysluvatnsrör. Það verk tók í heildina ellefu daga.
Þetta bitni ekki aðeins á þeim sem keyptu verkið heldur öðrum íbúum götunnar sem þurfa að nota stæðin.
