Friðrik Schram, fyrrverandi sóknarprestur í Íslensku kristskirkjunni, hvetur kristið fólk til að sniðganga hrekkjavökuna. Hátíðin er haldin í dag og víða eru krakkar á ferð í búningum að sníkja sætindi.
„Draugar og óhugnaður. Mér geðjast ekki að hrekkjavökunni,“ segir Friðrik færslu á Facebook fyrir skemmstu. „Trúað fólk ætti að sniðganga hana og forða börnum sínum frá áhrifum hennar.“
Vinsældir hrekkjavökunnar hafa farið ört vaxandi hér á landi og nú má segja að dagurinn sé orðinn vinsælli en öskudagurinn. Friðrik beinir orðum sínum til foreldra.
„Foreldrar, sýnið sjálfstæði og forðist hjarðhegðun í þessu sambandi. Börn skyldu vernduð fyrir því sem er ljótt og vekur ótta og hrylling,“ segir guðsmaðurinn.
Óhætt er að segja að færslan hafi fengið góðar viðtökur því henni hefur verið deilt víða. Einnig hafa margir sett þumal við færsluna eða skrifað athugasemd henni til stuðnings.
Á meðal þeirra sem eru ánægðir með hvatningu Friðriks er Geir Jón Þórisson, fyrrverandi varaþingmaður Sjálfstæðisflokksins og yfirlögregluþjónn í Reykjavík sem margir muna eftir frá mótmælunum eftir bankahrunið.
„Mikið er ég sammála þér Friðrik minn,“ segir Geir Jón.
Hafsteinn G. Einarsson, framkvæmdastjóri kristilegu útvarpsstöðvarinnar Lindarinnar, segist einnig vera hjartanlega sammála. „Verum salt og ljós í okkar samfélagi, svo fólk finni og sjái muninn á því sem Guðs er og þess sem heimsins er. Verndum börnin okkar,“ segir hann.
Þumal setja meðal annars Örn Bárður Jónsson, fyrrverandi sóknarprestur við Neskirkju.
Þó að sumir kirkjunnar menn séu ósáttir við hrekkjavökuna þá á hún reyndar sterk tengsl við kristni. Hátíðin er heiðin keltnesk uppskeruhátíð að uppruna en var tekin yfir af kirkjunni eins og svo margar aðrar. Fékk hún þá heitið allra heilagra messa, eða All hallows eve, þar sem allir dýrlingarnir voru tilbeðnir.
Um aldir var haldið upp á allra heilagra messu í Skotlandi og Írlandi en innflytjendur fluttu siðinn með sér til Norður Ameríku á 19. öld. Þar þróaðist hátíðin frá því að verða kirkjuleg í alþýðlega hátíð þar sem fólk klæðir sig upp sem ófreskjur og börn ganga húsa á milli til að sníkja sælgæti.
