Lögreglustjóri hefur krafist fjögurra vikna framlengingar á gæsluvarðhaldi yfir 42 ára konu sem grunuð er um að hafa orðið 58 ára gömlum manni að bana í íbúð í fjölbýlishúsi við Bátavog, laugardagskvöldið 21. september.
Það kemur í ljós síðar í dag hvort Héraðsdómur Reykjavíkur verður við kröfunni. Gæsluvarðhalds er krafist á grundvelli rannsóknarhagsmuna en lögregla er enn að vinna úr fjölda gagna í málinu.
Að sögn Ævars Pálma Pálmasonar aðstoðaryfirlögregluþjóns er krufningu á líki hins látna lokið. Hins vegar er ekki búið að vinna úr öllum niðurstöðum krufningarinnar.
Fram hefur komið að lögregla telur að manninum hafi verið ráðinn bani og enginn annar en konan sem situr í gæsluvarðhaldi er grunaður um verknaðinn.
Áður hefur komið fram að smáhundur, sem var í eigu konunnar, fannst dauður íbúðinni er lögregla kom á vettvang. Aðspurður fullyrðir Ævar í samtali við DV að dauði smáhundsins tengist ekki morðinu.
Héraðsdómur Reykjavíku hefur úrskurðað konuna í gæsluvarðhald til 21. nóvember að kröfu Lögreglunnar á höfuðborgarsvæðinu. Þetta kemur fram í tilkynningu frá lögreglunni.
