Tólf vetra hestur var skotinn nálægt Egilsstöðum um helgina. Lögreglan á Austurlandi rannsakar málið en dýralæknir hefur staðfest að skot úr byssu hafi orsakað dauða hestsins.
Mannlíf greindi fyrst frá málinu.
„Þarna lá hann bara,“ segir Marietta Maissen, tamningamaður og eigandi hestsins. En hrossið fannst við inngang stórrar girðingar. „Ég hélt fyrst að hann væri afvelta, sem getur gerst vegna hrossasóttar eða einhverju þannig. En ég tók eftir að hann var alveg hreinn. Þegar hross eru afvelta reyna þau að sparka upp allt í kringum sig og eru skítugir. Þá tók ég eftir þessu gati.“
Marietta segist sjálf ekki geta fullyrt að hesturinn hafi verið skotinn en lögregla og dýralæknir hafi brugðist þannig við málinu.
Kúla fannst ekki en gatið var nálægt herðablaðinu. Krumminn var byrjaður að plokka í hræið og fór í augað en þetta gat var ekki dæmigert sár eftir hrafn.
Dýralæknir hefur staðfest að um skot sé að ræða og að hesturinn hafi drepist vegna innvortis blæðinga.
Hesturinn hét Snæfinnur frá Finnsstaðakoti og var í eigu Mariettu og eiginmanns hennar Péturs Behrens. En auk þess að vera hestafólk eru þau listamenn og búa á Finsstaðakoti, austan við Egilsstaðaflugvöll.
Marietta segir ekki mikið fjárhagslegt tjón af þessu en tilfinningalegt.
„Okkur þykir vænt um öll hross. Þetta var ekki verðlaunagripur en hann var undan verðlaunahryssu og var taminn reiðhestur,“ segir hún. Það virðist hins vegar vera tilviljun að þessi hestur hafi verið skotinn. „Í hópnum eru mjög verðmæt hross,“ segir hún.
Marietta segist smeyk um að þetta geti komið aftur fyrir.
„Maður veit ekki hvað er í gangi. Þetta virðist ekki hafa verið slysaskot. Veiðimenn segja að svona skjóta menn hreindýr, rétt neðan við bringu, við herðablaðið. Þetta er mjög einkennilegt og svolítið óhugnanlegt. Ég veit ekki hvað þetta á að þýða,“ segir hún.
Guðjón Einarsson, bóndi á næsta bæ og umráðamaður yfir svæðinu, segir að hross séu geymd í þremur girðingum á svæðinu. 14 hross hafi verið í þessari girðingu og aldrei neitt komið fyrir áður.
„Þetta er ekki slys. Þetta er svo mikill hryllingur. Ég ætla ekki að segja þér hvernig ég svaf eftir að hafa heyrt þetta. Það var ekki notalegt. Ég er dýramaður og átti hesta í fjölda mörg ár,“ segir hann.
Maðurinn sem fjarlægði hræið hafi giskað á að gatið væri eftir 222 kalíbera byssu. Guðjón segir að það hreinlega fari um fólkið í sveitinni eftir þetta.
