„Þetta snýst um að veikja Rússland og þessi skýrsla snýst um hvernig á að teygja Rússland þannig að þeir hætti að ráða við stöðuna. Þeir [Bandaríkjamenn] kalla þetta þeirra eigið staðgengilsstríð (e. proxy war),“

segir Ögmundur Jónasson fyrrum ráðherra og þingmaður um áfangaskýrslu Bandaríkjamanna sem kom út tveimur árum fyrir innrás Rússa í Úkraínu. Ögmundur sem er nýjasti viðmælandi Frosta Logasonar í þætti hans Spjallið segir frá því hvernig bandarísk stjórnvöld hafi á undanförnum árum unnið leynt og ljóst að því að egna Rússa til stríðsins sem nú geisar í Úkraínu. Innrásin hafi sannarlega ekki verið tilefnislaus.

„Tveimur árum fyrir innrásina birta þeir áfangaskýrslu um hvað eigi að gera og þeir segja í þessari áfangaskýrslu að Bandaríkin eigi að grípa til aðgerða, millifyrirsagnirnar tala sínu máli, aðgerð eitt hindra olíuútflutning þeirra, tvö minnka gasútflutning og hindra uppbyggingu flutningsleiða, þrjú koma á efnahagsrefsiaðgerðum, fjögur auka rússneskan atgervisflótta. Og svo þessar geópólitísku aðgerðir þá segja þeir, aðgerð eitt veita Úkraínu vopnaaðstoð, aðgerð tvö auka stuðning við sýrlenska uppreisnarmenn, aðgerð þrjú stuðla að valdaskiptum í Hvíta-Rússlandi, aðgerð fjögur nýta spennuna í kákasuslöndum, fimm draga úr aðgerðum Rússlands í Mið-Asíu, aðgerð sex skora Rússland á hólm í Moldavíu.“

„Þetta miðar allt að því að veikja Rússland?“ spyr Frosti sem Ögmundur játar.

„Þeir [Bandaríkjamenn] eiga alla vega drjúgan þátt í því og eru sannanlega að koma í veg fyrir að þessu stríði ljúki.“

Segir Ögmundur að heimildir séu um að í mars í fyrra hafi samkomulag verið að nást sem Úkraínumenn voru að fallast á. „Þegar þetta var að ganga í gegn þá stöðvuðu Bandaríkjamenn það og hvernig get ég fullyrt það?“ segir Ögmundur og vísar til orða þáverandi forsætisráðherra Ísraela, Naftali Bennett. „Hann fullyrti þetta í fjölmiðlum að hann hafi verið ósammála en Bandaríkjamenn hafi stöðvað friðarprósessinn.

Við þurfum að horfa á það raunsætt að þetta eru öflin sem eru að koma í veg fyrir að þessu stríði ljúki. Það er bara staðreynd og þar stilla íslendingar sér upp líka. Það skal takast að stýra okkur öllum í ákveðinn farveg.“

Horfa má á þáttinn í heild sinni á brotkast.is.