Stýrivextir verða óbreyttir í 9,25 prósentum. Þetta ákvað Peningastefnunefnd Seðlabanka Íslands eins og fram kemur í tilkynningu í morgun.
Kemur fram að í heildina litið hafi þróun efnahagsmála verið í samræmi við mat nefndarinnar á síðasta fundi. Verðbólga jókst og var 8 prósent í september. Verðbólga án húsnæðis hækkað einnig en undirliggjandi verðbólga hefur hjaðnað lítillega.
„Vísbendingar eru um að heldur hafi dregið úr tíðni verðhækkana og að þær séu ekki á eins breiðum grunni og áður. Þótt verðbólguvæntingar séu áfram of háar hafa þær lækkað á suma mælikvarða,“ segir í tilkynningunni.
Hagvöxtur var 5,8 prósent á fyrri hluta ársins sem er lækkun frá fyrra ári, en þá var hann 7 prósent. Hægt hefur á vexti efnahagsumsvifa og vísbendingar eru um að skerpst hafi á þeirri þróun á þriðja ársfjórðungi.
Spenna er hins vegar enn þá á vinnumarkaðinum og þjóðarbúskapnum í heild. Raunvextir bankans hafa hækkað það sem af er ári og áhrifin farin að koma fram í meira mæli.
„Á þessum tímapunkti er nokkur óvissa um efnahagsframvinduna og hvort núverandi taumhald sé nægjanlegt,“ segir í tilkynningunni. „Nefndin hefur því ákveðið að staldra við en á næsta fundi mun liggja fyrir ný þjóðhags- og verðbólguspá bankans. Peningastefnan mun á næstunni ráðast af þróun efnahagsumsvifa, verðbólgu og verðbólguvæntinga.“
