Málaliðar úr Wagnerhópnum hafa verið áberandi í orustunni um Bakhmut en rússneski olígarkinn Yevgeni Prigozhin, einnig þekktur sem „Kokkur Pútíns“ stýrir hópnum en hann er eigandi Wagnerhópsins.
Nú hefur hann lyft hulunni, að minnsta kosti að hluta, af því af hverju hann vill ná Bakhmut á vald Rússa.
Ástæðan er meðal annars að á svæðinu eru „neðanjarðar bæir“. Reuters skýrir frá þessu.
En það er ekki það eina sem hann og Rússar sækjast eftir ef marka má það sem hann skrifaði á Telegram. „Punkturinn yfir i‘ið eru námur í Soledar og Bakhmut sem eru í raun net neðanjarðarbæja. Þar ekki aðeins pláss fyrir fjölda fólks á 80-100 metra dýpi, heldur geta skriðdrekar og önnur hernaðarökutæki ekið þar um,“ skrifaði hann að sögn Reuters.
Vestrænir sérfræðingar hafa furðað sig á endalausum tilraunum Rússa til að ná bænum sem hefur í raun litla hernaðarlega þýðingu. Þeir hafa orðið fyrir miklu mannfalli í orustunni um bæinn sem er að mestu rústir einar eftir bardagana.
Ef Rússar ná bænum á sitt vald mun það væntanlega auka völd og áhrif Prigozhin enn meira því Wagnerhópur hans leikur stórt hlutverk í hernaði Rússa í Úkraínu.
En það eru ekki aðeins „neðanjarðarbæirnir“ við Bakhmut sem Prigozhin horfir til.
Frá því í fyrri heimsstyrjöldinni hafa námur og göng, sem eru um 150 km á lengd, verið notuð til að geyma mikið magn af vopnum.
Prigozhin segir einnig að ef Rússum tekst að ná Bakhmut á sitt vald fái þeir „mikilvæga birgðastöð“ þar sem sé hægt að koma upp góðum vörnum.
The Guardian segir að Prigozhin vilji gjarnan komast yfir salt- og gipsnámur nærri Bakhmut og hefur þetta eftir bandarískum embættismanni. Sagði embættismaðurinn að vísbendingar væru um að það væru viðskiptahagsmunir sem reka Rússa áfram í tilraunum þeirra við að ná Bakhmut.
Bandarísk yfirvöld hafa áður sakað málaliða úr Wagnerhópnum um að hafa sölsað undir sig náttúruauðlindum í Malí, Súdan og fleiri ríkjum þar sem þeir hafa verið við störf á vegum rússneskra yfirvalda.
