Olga Pavlov átti erfitt með andardrátt þegar nágranni hennar sýndi henni áróðursmyndband frá stríðinu í Úkraínu. Ein af aðalpersónunum í því var Stanislav Bogdanov sem var dæmdur í 23 ára fangelsi fyrir 10 árum fyrir hrottalegt morð á bróður Pavlov. Hann var 32 ára og starfaði sem dómari í norðvestanverðu Rússlandi.

Bogdanov, sem nú er 35 ára, fór að heimili dómarans, Sergei Jiganov, í Novgorod. Hann reyndi að fá Jiganov til að láta PIN-númerin að greiðslukortum sínum uppi. Hann pyntaði Jiganov alla nóttina með járnstöng en um morguninn drap hann hann með því að kasta þremur handlóðum í andlit hans.

Bogdanov afplánaði aðeins 10 ár af dómi sínum áður en hann og fleiri úr sama fangelsi fengu óvænt tilboð frá Yevgeny Prigozhin, sem oft er nefndur „Kokkur Pútíns“, eiganda málaliðafyrirtækisins Wagner Group. Þeim stóð til boða að berjast í sex mánuði í Úkraínu. Þeim var heitið mánaðarlaunum upp á sem svarar til um 500.000 íslenskra króna og líftryggingu upp á sem svarar til um 12 milljóna íslenskra króna. Rúsínan í pylsuendanum var síðan að ef þeim lifðu þessa sex mánuði af myndu þeir fá sakaruppgjöf og vera lausir allra mála hjá Wagner Group.

„Ég hélt að það væri bara Zelenskyy sem hleypti fólki út úr fangelsi til að fara í stríð,“ sagði Pavlova í samtali við óháða rússneska miðilinn Thenewtab. Jótlandspósturinn segir að þarna hafi hún vísað til þess að skömmu eftir innrás Rússa sagði franska dagblaðið Le Figaro að Zelenskyy hafi sent 363 fanga, sem allir höfðu gegnt herþjónustu, til vígstöðvanna.

Wagner Group hefur verið öllu umsvifameiri í að fá fanga til liðs við sig og telja vestrænar leyniþjónustustofnanir að 30.000 til 50.000 fangar hafi verið sendir á vígvöllinn á vegum Wagner Group.

Bogdanov þáði boð Wagner Group og var sendur til Donbas þann 31. júlí ásamt tveimur samföngum sínum. Viku síðar missti hann annan fótinn þegar handsprengja sprakk nærri honum. Það sem eftir var af fætinum var tekið af honum í Luhansk.

Hann var þá orðinn gagnslaus á vígstöðvunum og var því sendur heim til Rússlands. Þegar þangað var komið fékk hann hlutverk í áróðursmyndbandi með öðrum fyrrum föngum. Þeir voru sæmdir heiðursmerkjum og fengu skjal, sem staðfesti sakaruppgjöf þeirra, afhent.

„Áður voruð þið lögbrjótar, nú eruð þið stríðshetjur,“ segir Prigozhin í myndbandinu. Hann hyllir síðan fanga í fleiri myndböndum og segir þá vera bestu syni Rússlands.