Rússar gátu líklega séð með löngum fyrirvara að þetta var að fara að gerast en samt er eins og þeir viti ekki hvað þeir eiga að halda um þetta eða gera. Það er eins og Pútín og hans fólk sé hissa, að þeim hafi verið komið á óvart.

Þetta er að minnsta kosti ekki ólíklegt að mati Flemming Splidsboel,  sérfræðings í rússneskum málefnum hjá Dansk Institut for Internationale Studier.  Hér á hann við ákvörðun Vesturlanda um að senda Úkraínumönnum skriðdreka og þá einna helst ákvörðun Þjóðverja og Bandaríkjamanna um að senda þeim Leopard 2 og Abrams.

Splidsboel fylgist vel með því sem er að gerast í Rússlandi. Í samtali við B.T. sagði hann að það væri ansi misjöfn mynd sem væri dregin upp af þessari ákvörðun Vesturlanda í rússneskum fjölmiðlum. Í sumum sé fjallað um þá ógn sem stafi af skriðdrekunum en í öðrum sé gert lítið úr henni.

Hann sagði að hann sjái ekki eina ráðandi skoðun eða stemmningu í rússneskum fjölmiðlum í umfjöllun þeirra um þetta.

Hugsanlega séu þeir ráðvilltir, viti ekki hvernig á að bregðast við. „Margir spyrja hvað þetta þýði. Hvar Vesturlönd standi núna, pólitískt og hernaðarlega gagnvart Rússlandi. Hluti af frásögninni er að Vesturlönd hafi undirbúið þetta í langan tíma. Pútín hefur sjálfur sagt að Bandaríkin neyði Evrópu til að styðja Úkraínu, þrátt fyrir að Evrópuríki vilji það ekki. En ég sé ekki neina heildarmynd. Þeir geta ekki fundið út úr hvernig þeir eiga að bregðast við,“ sagði Splidsboel.

Hann sagði ekki útilokað að nú hafi vestrænir leiðtogar komið Pútín í opna skjöldu.