Hollendingar opnuðu nýlega á þennan möguleika og sögðust ekki sjá neitt því til fyrirstöðu að Úkraínumenn fái F-16 orustuþotur. Fleiri NATO-ríki eru opin fyrir þessari hugmynd og nú hefur einn ein röddin bæst í hóp þeirra sem eru jákvæðir í garð þessarar hugmyndar.
Hún berst frá mikilvægri verksmiðju í Greenville í Bandaríkjunum. Þar er vopnaframleiðandinn Lockhead Martin til húsa og segist reiðubúinn til að aðstoða þá sem vilja láta Úkraínumenn fá F-16 vélar.
„Nú er mikið rætt um að senda þeim F-16 í gegnum þriðja ríki. Við erum að auka framleiðslugetu okkar í verksmiðjunni í Greenville í Suður-Karólínu svo við getum hjálpað nánast öllum þeim ríkjum sem vilja aðstoða Úkraínu í stríðinu,“ sagði Frank St. John, varaforstjóri Lockhead Martin, í samtali við Financial Times.
Það að láta Úkraínumenn fá orustuþotur þýðir að Vesturlönd fara yfir hina rauðu línu sem Pútín hefur dregið varðandi stuðning Vesturlanda við Úkraínu. En rétt er að hafa í huga að Vesturlönd hafa margoft farið yfir þessa rauðu línu og hún hefur færst sífellt aftar þegar kemur að vopnasendingum til Úkraínu.
Í vor náði rauða línan yfir HIMARS-flugskeytakerfið, síðan voru það skriðdrekarnir.
Nú snýst umræðan um hvort það sé nauðsynlegt fyrir Úkraínumenn að fá orustuþotur til að geta sigrað í stríðinu eða hvort það sé óþarfa ögrun við Rússland.
Petro Poroshenko, fyrrum forseti Úkraínu, fagnar ákvörðun Vesturlanda um að senda skriðdreka til úkraínska hersins en leggur áherslu á að það dugi ekki eitt og sér. „Það sem gæti skipt sköpum eru orustuþotur. Þær gætu skipt öllu máli. Við verðum nú þegar að hefjast handa við þjálfun úkraínskra flugmanna, svo við séum tilbúin ef við fáum flugvélar,“ sagði hann í samtali við Euronews.
Pólland og Eystrasaltsríkin hafa lengi talað fyrir því að Vesturlönd hætti að tipla á tánum í kringum Rússland. Í upphafi stríðs buðust Pólverjar til að senda úkraínska hernum MIG-29 þotur sínar, sem eru frá tíma Sovétríkjanna, gegn því að fá F-16 frá Bandaríkjunum. Þá töldu Bandaríkjamenn það vera of mikla ögrun í garð Pútíns.
