Jacob Kaarsbo, sérfræðingur í rússneskum málefnum hjá dönsku hugveitunni Tænketanken Europa, sagði í samtali við TV2 að ákvörðun Þjóðverja geti haft mikil áhrif á gang stríðsins. „Blekið er ekki þornað en ég held að þetta sé rétt í þetta sinn. Þjóðverjar hafa verið undir gríðarlegum þrýstingi síðustu vikur,“ sagði hann.
Þýsk stjórnvöld hafa ekki staðfest opinberlega að þau ætli að senda Leopard skriðdreka til Úkraínu en stórir þýskir fjölmiðlar og erlendar fréttaveitur á borð við Reuters hafa heimildir fyrir því að ákvörðunin hafi verið tekin. Politico segir að tilkynnt verði um þetta formlega klukkan 12 í dag, að íslenskum tíma, í þýska þinginu.
Flemming Splidsboel, sérfræðingur hjá Dansk Institut for Internationale Studier, sagði í samtali við TV2 að Vesturlönd verði að vera undir það búið að Pútín teygi sig upp í efstu hillu vopnabúrsins og sæki kjarnorkuvopn.
Hann sagðist telja að hætta sé á að átökin stigmagnist í ljósi frétta af því að Þjóðverjar ætli að heimila að Leopard 2 skriðdrekar verði sendir til Úkraínu og í ljósi þess að fleiri ríki tali um enn frekari sendingar á þungavopnum til Úkraínu. Einnig má nefna að í síðustu viku opnuðu Hollendingar á umræðuna um að Úkraínumenn fái F-16 orustuþotur frá Vesturlöndum.
„Við verðum að hafa sviðsmynd sem býr okkur undir að Rússland stigmagni átökin á mismunandi hátt, þar á meðal með notkun kjarnorkuvopna,“ sagði Splidsboel.
