Moldóva fékk stöðu umsóknarríkis að ESB á síðasta ári. Ríkisstjórn landsins er hliðholl Vesturlöndum og hefur áhyggjur af fyrirætlunum Pútíns.
„Spurningin er ekki hvort það verður ný sókn á landsvæði Moldóvu, heldur hvenær það gerist. Verður það í byrjun árs, janúar-febrúar, eða síðar, í mars-apríl?“ sagði Alexandru Musteata, yfirmaður leyniþjónustu landsins, í sjónvarpsviðtali skömmu fyrir jól.
Orðræða Kremlverja að undanförnu hefur heldur ekki verið til þess fallinn að róa taugar Moldóva. Mikhail Galuzin, varautanríkisráðherra Rússlands, sagði um jólin að reynslan hafi sýnt að það styrkja her sinn með vestrænum vopnum eða með fá hersveitir NATO inn á landsvæði sitt hafi ekki aukið öryggi eða tryggt fullveldi.
Um 2,5 milljónir búa í Moldóvu sem hefur áratugum saman átt í deilum við Transnistríu, sem er sjálfsstjórnarsvæði sem Rússar styðja og vernda. Svæðið hefur í raun verið sjálfstætt frá því í byrjun tíundar áratugarins þegar stríð geisaði þar. Áður var það hluti af Moldóvu. Þar er nú rússnesk herstöð og stór skotvopnageymsla Rússa.
Þetta ástand hefur haft mikil áhrif á Moldóvu sem hefur árum saman fylgt varfærinni pólitískri stefnu á milli Kreml og Vesturlanda.
Í forsetakosningum í árslok 2020 sigraði Maia Sandu. Hún er hliðholl Vesturlöndum og endurbótum og frá kjöri hennar hefur Moldóva færst töluvert nær ESB og NATO.
Það að Moldóvar hafa hallað sér sífellt meira að Vesturlöndum hefur farið illa í Kremlverja og meira hefur verið um núning í sambandi Moldóvu og Rússlands. Frá því síðasta vor hafa Rússar verið með mikla áróðursherferð gegn Moldóvu. Í desember brugðust moldóvsk stjórnvöld við þessu með því að afturkalla útsendingarleyfi sex rússneskumælandi sjónvarpsstöðva.
Allt frá tímum Sovétríkjanna hafa Rússar verið með hermenn í Moldóvu. Nú eru um 1.500 hermenn í Transnistríu og eru þeir sagðir vera friðargæslulið. Þetta er ekki fjölmennt herlið en geta Moldóva til að verja sig er ekki mikil. Um 90% af hergögnum landsins eru frá tímum Sovétríkjanna. Her landsins samanstendur af 6.5000 atvinnuhermönnum auk 2.000 sem gegna herskyldu að sögn Radio Liberty.
