Anders Puck Nielsen, hernaðarsérfræðingur við danska varnarmálaskólann, sagði í samtali við Danska ríkisútvarpið að árásir helgarinnar bendi til að Rússar eigi orðið erfitt með verða sér úti um nóg af nýjustu og öflugustu stýriflaugunum.
Hann sagði að það muni ekki fara svo að þeir verði algjörlega uppiskroppa með nýjustu tegundir flugskeyta því þeir framleiði enn slík flugskeyti en hins vegar nálgist sá tímapunktur þar sem Rússar geti ekki skotið fleiri flugskeytum en þeir geta framleitt. Aðrir sérfræðingar hafa einmitt sagt áður að Rússar séu að verða uppiskroppa með stýriflaugar og það hafa Úkraínumenn einnig sagt.
Nielsen sagði flugskeytin, sem voru notuð um helgina, hafi komið frá öðrum löndum og séu að sögn gömul og ónákvæm. Hann sagði að Rússar hafi tekið mikla áhættu og hugsanlega stimplað inn hnit á svæði þar sem íbúðarhúsnæði er. Ef þeir hafi gert það viljandi þá marki það þáttaskil í hvernig þeir beita flugskeytum sínum. Áður hafi þeir einbeitt sér að innviðum en nú virðist sem þeir hafi einnig valið skotmörk sem var ætlað að valda ótta.
Hann sagði að ef þetta sé ný taktík Rússa þá geti hún verið afleiðing þess að þeir hafi viðurkennt að áætlun þeirra um að frysta Úkraínumenn í vetur hafi mistekist. Þeir hafi ráðist á orkustöðvar en Úkraínumönnum hafi tekist að bregðast vel við og hafi því komist sæmilega í gegnum veturinn hvað varðar innviði.
