Indversk stjórnvöld segja að hryðjuverkamönnum sé veitt öruggt skjól í Kanada og hefur sett á bann við vegabréfsáritunum til kanadískra ríkisborgara. Þau hafa gripið til þessara aðgerða eftir að kanadísk stjórnvöld sökuðu þau indversku um að standa á bak við morð á kanadískri grund en fórnarlambið barðist fyrir því að sérstakt ríki síkha yrði stofnað á Indlandi.
Talsmaður indverska utanríkisráðuneytisins sagði við fjölmiðla í gær að Kanada yrði að gæta að orðstír sínum á alþjóðavettvangi í auknum mæli. Það hafi aukist að horft sé til Kanada sem öruggs skjóls fyrir hryðjuverkamenn, öfgamenn og skipulagða glæpastarfsemi.
Þessi orð koma í kjölfar banns við vegabréfsáritunum kanadískra ríkisborgara til Indlands. Segjast indversk stjórnvöld hafa gripið til þessa ráðs vegna aukinna ógna gegn öryggi indverskra stjórnarerindreka í Kanada og aðgerðarleysis kanadískra sttjórnvalda vegna þessara ógna.
Upphaf þessara deilna landanna má rekja til þess að fyrr í þessari viku sakaði Justin Trudeau, forsætisráðherra Kanada, indversk stjórnvöld um að standa mögulega á bak við morð sem framið var í borginni Surrey í júní síðastliðnum. Þá var Hardeep Singh Nijjar sem beitt hefur sér fyrir sérstöku ríki síkha á Indlandi skotinn til bana af tveimur grímuklæddum mönnum.
Indversk stjórnvöld segja slíkar fullyrðingar vera fáránlegar og ekki studdar neinum gögnum eða upplýsingum. Þau hafa lengi sakað kandadísk stjórnvöld um aðgerðaleysi gagnvart því sem þau segja vera öfgasinnaða aðskilnaðarhreyfingu síkha sem vilji stofna sérstakt ríki sem kalla eigi Khalistan og sé ætlað að ná meðal annars yfir landsvæði sem nú tilheyrir Punjab-ríki á Indlandi.
Niijar talaði opinberlega fyrir því að Khalistan yrði stofnað. Indland lítur á kröfur um stofnun Khalistan sem alvarlega ógn við þjóðaröryggi.
Margvísleg samtök sem beita sér fyrir því að Khalistan verði til eru á lista indverskra stjórnvalda yfir hryðjuverkasamtök. Hardeep Singh Nijjar var á lista yfir hryðjuverkamenn.
Mörg samtök síkha sem staðsett eru utan Indlands segja að hreyfingin sem beitir sér fyrir stofnun Khalistan hafi verið ranglega sökuð um hryðjuverkastarfsemi af indverskum stjórnvöldum. Samtökin segjast munu beita sér áfram með friðsamlegum hætti fyrir stofnun Khalistan á meðan ljósi verði varpað á það sem þau segja mannréttindabrot sem síkhar hafi orðið fyrir til margra ára á Indlandi.
Stjórnmálaskýrendur segja hins vegar að stuðningsmenn þess að Khalistan verði til séu áhrifalitlir og á jaðrinum í indversku samfélagi. Þessar hugmyndir njóta hins vegar nokkurs stuðnings meðal áhrifamikilla síkha sem búa erlendis, einkum í Kanada, Bretlandi og Ástralíu.
Um 770.000 síkhar búa í Kanada og morðið á Hardeep Singh Nijjar vakti mikinn óhug meðal margra þeirra. Enginn hefur verið handtekinn grunaður um morðið en kanadíska lögreglan hefur þrjá grunaða menn til rannsóknar og leitar að bifreið sem talið er að morðingjarnir hafi nýtt til að flýja af vettvangi.
Það var CNN sem greindi frá.
