Ormurinn langi, Pump track, dorgbryggja, hugleiðsluróla, hundagerði, hjólabraut, áningastaður á horni gistiskýlisins við Lindargötu, nálabox, snjallhjólastæði, jólaljós í Vesturbæjarlaug, matjurtagarður, vatnspóstar, almenningssalerni, gönguleið á Úlfarsfell, gaga völlur, átthagafræðsla, stoppistuð, útsýnispallur við Kermóafoss, stækkun vaðlaugar og fjölmargar fleiri hugmyndir borgarbúa eru í boði fyrir borgarbúa að kjósa um í ár í Hverfið mitt.
Kosning hófst á miðnætti og hafa íbúar úr 450 milljónum að spila í ár og eru hugmyndirnar sem velja má um alls 197 talsins. Áætlaður kostnaður við framkvæmd hugmyndanna er á bilinu 1 milljón og upp úr, þær tvær dýrustu í framkvæmd 57 milljónir króna.
Íbúar Laugardals eiga þrjár dýrustu hugmyndirnar, pump track við brettavöllinn í Laugardalnum, völundarhús og dorgbryggju, allar með áætlaðan kostnað upp á 57 milljónir króna. Íbúar Breiðholts og íbúar Grafarholts og Úlfarsárdals eiga ódýrustu hugmyndirnar, annars vegar að setja upp nálabox á völdum stöðum í Breiðholti og hins vegar að stika gönguleið við rætur Úlfarsfells í átt að Hafravatni, það er í hlíðinni fyrir ofan Úlfarsfellsveg, báðar með áætlaðan kostnað upp á 1 milljónir króna.
Á meðal hugmynda í Vesturbæ eru sögugarður Guðrúnar Helgadóttur rithöfunds, jólaljós í Vesturbæjarlaug, vistlegri Ránargata, Padelvöllur og kaldur pottur í Vesturbæjarlaug, sem er dýrasta framkvæmdin upp á 53 milljónir króna, meðan jólaljósin í lauginni eru sú ódýrasta upp á 2 milljónir króna. Íbúar Vesturbæjar hafa 53 milljónir til ráðstöfunar og 25 hugmyndir að velja úr.
Á meðal hugmynda í miðborginni eru áningastaður á horni Lindargötu og Frakkastígs, þar sem gistiskýlið er, gosbrunnur og andahús í Tjörnina, það seinna er á meðal ódýrari hugmynda hverfisins upp á 4 milljónir króna, sauna í Sundhöllina og almenningssalerni í Hljómskálagarðinn, en þær síðastnefndu eru þær dýrustu í framkvæmd, hver upp á 39 milljónir króna. Íbúar Miðborgar hafa 39 milljónir til ráðstöfunar og 25 hugmyndir að velja úr.
Á meðal hugmynda í Hlíðahverfi eru matjurtagarður, hundagerði, yfirbyggt grill, almenningssalerni, mini-golf og hjólabrettagarður á Klambratúni, en þrjár síðastnefndu eru dýrastar í framkvæmd, 41 milljón hver. Ungbarnarólur í Hlíðunum eru ódýrastar eða 2 milljónir króna. Íbúar Hlíðahverfis hafa 41 milljónir til ráðstöfunar og 25 hugmyndir að velja úr.
Á meðal hugmynda í Háaleiti og Bústaðahverfi eru hjólastæði við leikskólann Múlaborg, sem er ódýrasta framkvæmdin upp á 3 milljónir króna, hjólabraut, söguskilti, og endurbætur á fótboltavelli sem er dýrasta framkvæmdin upp á 27 milljónir króna. Íbúar Háaleitis og Bústaða hafa 51 milljónir til ráðstöfunar og 25 hugmyndir að velja úr.
Á meðal hugmynda í Laugardal eru pump track, völundarhús og dorgbryggja sem eru þær dýrustu, 57 milljónir hver, jólaland í Laugardal, og útigrill á Aparóló, sú ódýrasta upp á 3 milljónir króna. Íbúar Laugardals hafa 57 milljónir til ráðstöfunar og 25 hugmyndir að velja úr.
Á meðal hugmynda á Kjalarnesi eru gaga völlur sem er sú ódýrasta upp á 1 milljón króna, hreiðurróla, klifurgrind og heitavatnspottur við sjósundsaðstöðuna, en þær eru á meðal þeirra dýrustu sem hver kostar 13 milljónir króna. Íbúar Kjalarness hafa 14 milljónir til ráðstöfunar og 22 hugmyndir að velja úr.
Á meðal hugmynda í Grafarvogi eru leikvöllur undir þaki sem er dýrasta hugmyndin upp á 40 milljónir króna, gróðurlundur, vatnspóstar, minigolf og stjörnukíkir sem er ódýrasta framkvæmdin upp á 3 milljónir króna. Íbúar Grafarvogs hafa 56 milljónir til ráðstöfunar og 25 hugmyndir að velja úr.
Á meðal hugmynda í Grafarholti og Úlfarsárdals eru gönguleið á Úlfarsell sem er sú ódýrasta upp á 1 milljón króna, samfélagsgróðurhús, strandblakvöllur, tennisvöllur, gosbrunnur, hundagerði og bryggja við Reynisvatn, en fjórar síðastnefndu eru þær dýrustu í framkvæmd, hver upp á 25 milljónir króna. Íbúar Grafarholts og Úlfarsárdal hafa 31 milljónir til ráðstöfunar og 25 hugmyndir að velja úr.
Á meðal hugmynda í Árbæ eru sumarblóm í hringbraut sem er sú ódýrasta upp á 2 milljónir króna, samverustaður við Rauðavatn, leiktæki fyrir fatlaða, Parkourvöllur og tvær dýrustu hugmyndirnar, útsýnispallur við Kermóafoss og endurbætur á leik- og útivistarsvæði við Rofabæ, hver upp á 38 milljónir króna. Íbúar Árbæjar hafa 41 milljónir til ráðstöfunar og 25 hugmyndir að velja úr.
Á meðal hugmynda í Breiðholti eru yfirbyggður leikvöllur, Prins Róló, útikennslustofa, nálabox sem eru ódýrasta hugmyndin upp á 1 milljón króna og stækkun vaðlaugar í Breiðholtslaug sem er dýrasta framkvæmdin upp á 50 milljónir króna. Íbúar Breiðholts hafa 61 milljónir til ráðstöfunar og 25 hugmyndir að velja úr.
Allir sem fæddir eru árið 2008 eða fyrr og eiga lögheimili í Reykjavík, óháð ríkisborgararétti, geta tekið þátt í kosningunni. Kosningin er rafræn og stendur yfir til miðnættis 28. september.
Kjósandi velur fyrst hvaða hverfi hann ætlar að kjósa í og velur svo sínar uppáhalds hugmyndir þangað til að fjárhæð hverfisins hefur verið ráðstafað. Að lokum er smellt á kjósa. Hægt er að kjósa í snjallsíma, tölvu eða spjaldtölvu, hvar sem er og hvenær sem er. og kjósendur skrá sig inn með rafrænum skilríkjum eða Íslykli.
Í tilkynningu frá Reykjavíkurborg segir að tilvalið sé fyrir fjölskyldur að kjósa saman, njóta liðsinnis barna og unglinga á heimilinu sem geta ekki kosið, og gefa þeim tækifæri á að velja verkefni sem þeim finnst eigi að fá atkvæði.Það er hægt að fá aðstoð við að kjósa í þjónustuveri Reykjavíkurborgar, Borgartúni 12-14, og hjá þjónustumiðstöðvum Reykjavíkurborgar á meðan á kosningunni stendur. Einnig má senda fyrirspurnir á hverfidmitt@reykjavik.is. Til að auðvelda þátttöku íbúa sem ekki hafa íslensku sem fyrsta mál er vefurinn einnig á pólsku og ensku. Allar nánari upplýsingar má nálgast á vefsíðu Reykjavíkurborgar: Kosningar – Hverfið mitt.
