Aðeins í Hong Kong er bensínlítrinn dýrari en á Íslandi. Samkvæmt síðunni Global Petrol Prices er meðalverð bensíns á Íslandi rúmar 316 krónur í september mánuði árið 2023. Ísland er því það sjálfstæða ríki þar sem bensínið kostar mest.
Í sjálfstjórnarborginni Hong Kong, sem er innan Kína, kostar bensínlítrinn heilar 413 krónur. Þetta er margföld upphæð bensínverðs í Kína, sem er einungis tæpar 160 krónur.
Fyrir utan Hong Kong og Ísland kostar bensínlítrinn meira en 300 krónur í tveimur löndum. Það eru Holland og Mónakó, sem eru bæði á meðal þéttbýlustu landa heims.
Almennt séð er bensín mjög dýrt í vesturhluta Evrópu því þar á eftir koma Liktenstein, Noregur, Danmörk, Finnland, Grikkland, Sviss, Ítalía og Frakkland þar sem bensínið kostar á bilinu 278 til 297 krónur.
Í Bretlandi og Svíþjóð er verðið 255 krónur, á Spáni 248, Póllandi 205, Japan og Indlandi 168, Brasilíu 158, Ástralíu 157, Bandaríkjunum 146, Rússlandi 78 og Íran 3 krónur.
Langódýrast er bensínið í olíuframleiðsluríkinu Venesúela, því þar kostar bensínlítersins rúmlega hálfa krónu hjá ríkisverslunum. Hafa ber þó í huga að erfitt er fyrir íbúa landsins að nálgast þetta niðurgreidda bensín, sem oft er af skornum skammti. Flestir þurfa að greiða mun meira fyrir bensínið hjá þriðja aðila.
Þegar kemur að dísilolíu stendur Ísland örlítið betur að vígi. Meðalverð dísellítrans eru tæplega 312 krónur hér á landi, sem er það þriðja hæsta. Sem fyrr er verðið hæst í Hong Kong, 384 krónur, en í öðru sæti kemur Svíþjóð með 312 krónur.
Ýmsir þættir skýra hátt bensín og dísil verð á Íslandi. Meðal annars almennt hátt verðlag fyrir vörur og þjónustu, háir olíu og virðisaukaskattar, flutningskostnaður og fákeppni á markaði sem meðal annars leiddi til olíusamráðsmálsins mikla.
Þegar þetta er skrifað er bensínlítrinn ódýrastur hjá Costco í Kauptúni í Garðabæ. Það kemur fram hjá Gasvaktinni. Hann kostar tæpar 274,7 krónur, en kaupa þarf árskort í verslunina sem kostar 4.800 krónur.
Þar á eftir koma fimm verslanir Orkunnar með 293,2 krónur. Á Bústaðavegi, Dalvegi, Mýrarvegi, Reykjavíkurvegi og Suðurfelli.
Dýrasta bensínið er að finna í verslun Olís í Hrauneyjum í Rangárþingi ytra. Þar kostar lítrinn 329,8 krónur.
