Samkeppnis og neytendasamtök, meðal annars í Írlandi og Kanada, hafa gefið út viðvaranir vegna gelkúlna sem notaðar eru í leikfangabyssur. Kúlurnar, sem heita Orbeez, eru mjög vinsælar og til eru fjölmörg myndbönd á samfélagsmiðlum þar sem kúlurnar eru notaðar í hinar ýmsu tilraunir.
Samkvæmt CCPC, samkeppnis og neytendaverndarsamtökum Írlands, hafa vinsældir kúlnanna aukist mjög mikið á undanförnum mánuðum.
Kúlurnar eru sérstaklega hættulegar ungabörnum sem geta gleypt kúlurnar eða sett þær í eyru eða nef. Kúlurnar eru ákaflega litríkar og líta út eins og sælgæti. Er ráðlagt að halda kúlunum algerlega frá ungum börnum.
Kúlurnar draga í sig vökva og margfaldast að stærð við það. Þyngd þeirra meira en hundraðfaldast.
Varað er við því að fólk geti kafnað á kúlunum þegar þær blása út í öndunarveginum. Ef þær komast þar í gegn geta þær blásið út í meltingarveginum og valdið lífshættulegri iðrateppu. Hefur stofnunin fengið margar tilkynningar um þetta þar sem foreldrar hafa þurft að leita með börn sín á spítala.
Kúlurnar geta einnig þanist út í eyrum barnanna og setið þar fastar eða í nefi.
Mælst er til þess að foreldrar og aðrir umsjáraðilar fræði eldri börn um notkun kúlnanna og segi þeim að láta þau yngri aldrei hafa þær. Ekki eigi að leyfa eldri börnum að hafa kúlurnar fyrr en þær hafa náð fullri stærð í vatni. Eftir notkun verði að passa að þær séu allar horfnar af leiksvæðinu. Ef grunur leikur á að barn hafi gleypt eða fest gelkúlu í líkamsopi eigi alltaf að leita til læknis.
Þá sé góð regla að aðskilja öll leikföng eldri og yngri barna, ekki aðeins vegna gelkúlnanna heldur allra leikfanga. Alltaf eigi að skoða umbúðir leikfanga til að sjá fyrir hvaða aldur þau henta.
