Myndband er núna í dreifingu á samfélagsmiðlum af handtöku sérsveitarinnar í Mosfellsbæ. Hinn handtekni hafði ógnað fólki með hnífi í verslun.

„Þeir eltu hann og hann var kominn í öngstræti þarna inni í Álafosskvosinni,“ segir Jón Julíus Elíasson, garðyrkjumeistari sem býr þarna í nágrenninu. Hann var á leið út í vinnubílinn sinn á þriðjudaginn þegar hvítur sendibíll var næstum búinn að keyra hann niður.

„Hann náði nánast að keyra mig niður. Ég var að labba yfir bílaplanið hjá mér,“ segir Jón Júlíus. „Mér var mjög illa við þetta og fannst þetta alveg skelfilegt,“ segir hann.

Maðurinn í bílnum hafði ógnað starfsfólki á veitingastað í hverfinu með hnífi og svo flúið af vettvangi. Í frétt Mannlífs af málinu kemur fram að starfsfólk veitingastaðarins hafi verið í áfalli eftir uppákomuna.

Mölva rúðuna með rifflum

Í myndbandinu sést hvernig tveir sérsveitarmenn, vopnaðir hríðskotarifflum, á ómerktum lögreglubíl handtaka manninn. Króa þeir bifreiðina af og mölva hægri framrúðuna með skeftunum á rifflunum til að geta opnað hurðina og ná manninum út úr bílnum.

@kadabraabra3 #asasoundthelapolice #police #mentai #ragai #fyp ♬ original sound – biržos makleris

Í tilkynningu Lögreglunnar á höfuðborgarsvæðinu á þriðjudag kemur fram að þegar lögregla náði að stoppa manninn og handtaka kom í ljós að hann hafi verið undir áhrifum fíkniefna. Var hann vistaður í fangageymslu.

Rannveig Þórisdóttir, sviðsstjóri hjá Ríkislögreglustjóra, segist ekki geta gefið neinar upplýsingar um málið.