Áráttukenndur stórþjófur hefur að undanförnu valdið miklum usla í miðbænum. Maðurinn heitir Arturas Safarian og er frá Litháen en býr á Freyjugötu í Reykjavík. Undanfarið hefur DV orðið vart við nokkrar tilkynningar frá sárum borgurum sem bera þjófnað á Arturas.
Hjólhestahvíslarinn Bjartmar Leósson, sem hefur vakið landsathygli fyrir að endurheimta stolin reiðhjól og annað þýfi, segir manninn hafa stolið fyrir milljónir. Bjartmar endurheimti nýlega dýrt Trek-hjól úr vörslu mannsins en segir hann enn sitja á miklum stolnum verðmætum sem hann hefur ekki tekist að endurheimta frá honum. Á Facebook skrifar Bjartmar:
„Þessi gæi enn og aftur.
Hann var með þetta Trek rafhjól í dýrari kantinum sem er nú hjá eiganda sínum eftir að við náðum því af honum. Svo er hann líka með Dewalt verkfærakassa og verkfæratösku. Náði því ekki af honum því miður. Hann heldur til á Freyjugötu [X XXXXXXX – úrfelling: DV]. Alltaf bara pollrólegur og sultuslakur, búinn að stela hér fyrir margar milljónir.
Og Lögreglan á höfuðborgarsvæðinu er bara sátt við stöðu mála…
Allavega er EKKERT að gerast.“
Bjartmar segir í samtali við DV að á tímabili hafi þetta verið eini maðurinn sem hann var að sækja stolin hjól til, svo stórtækur hafi hann verið í gripdeildum sínum.
Ekki skal véfengt að lögregla hafi lítið aðhafst varðandi brot Arturas að undanförnu en ljóst er að lögregla hefur áður haft afskipti af honum því þann 2. mars síðastliðinn féll dómur yfir Arturas í Héraðsdómi Reykjavíkur þar sem hann var sakfelldur fyrir tvær líkamsárásir og ógrynni þjófnaðarbrota. Brotin sem ákært var fyrir voru um 20, hann játaði mörg þeirra, en ákæruvaldið féll frá einhverjum. Var hann þó sakfelldur fyrir meirihluta brotanna, meðal annars líkamsárásir sem hann neitaði að hafa framið.
Þjófnaðarbrotin sem hann var ákærður fyrir voru allt frá því að stela áfengisflösku upp í að stela bílum. Var hann dæmdur í 12 mánaða skilorðsbundið fangelsi og hefur því ekki þurft að sitja í fangelsi vegna þessara brota. Hann var einnig dæmdur til að greiða ýmsum aðilum skaðabætur, hæstar öðrum þeim aðila sem varð fyrir líkamsárás af hans hendi, rúmlega 700 þúsund krónur.
Svo virðist sem Arturas hafi stundað alræmda iðju sína grimmt frá því dómurinn féll yfir honum í mars og ekkert lát virðist á þjófnuðum hans. Ljóst er af framansögðu að stundum stelur hann miklum verðmætum, rándýrum hjólum og verkfærasettum.
Ekki tókst að ná samband við Arturas við vinnslu fréttarinnar.
