Nýlega var ung íslensk kona, sem átti íslenska móður og bandarískan föður, skotin til bana í Detroit í Bandaríkjunum. Unga konan hét Iyanna Brown og var aðeins 23 ára. Móðuramma hennar, Ingunn Ása Ingvadóttir, hefur komið af stað söfnun fyrir útfararkostnaðinum.

Sjá einnig: Ung íslensk kona skotin til bana í Detroit

Sjá einnig: Ingunn safnar fyrir útfararkostnaði ömmubarnsins sem var skotin til bana aðeins 23 ára að aldri – „Sársaukinn óbærilegur“

Meðal frænda Iyanna í móðurættinni er hinn kunni baráttumaður Guðmundur Felix Grétarsson sem eins og öllum Íslendingum ætti að vera kunnugt fékk grædda á sig nýja handleggi. Ljóst er að Guðmundur Felix eins og aðrir ættingjar Iyanna syrgja ótímabært fráfall hennar mjög.

Í nýrri færslu á Facebook-síðu sinni segir Guðmundur Felix (Í þýðingu fréttamanns):

„Kæru vinir, í síðustu viku gerðist hræðilegur atburður. Litla frænka mín (23) var skotin til bana þegar hún var farþegi í bíl. Móðir hennar sem er einstæð og býr í Detroit er því miður ekki í aðstöðu til að greiða allan kostnað við útförina. Ef einhver getur látið nokkra dollara af hendi rakna þá væri það þegið með miklum þökkum. Þakka ykkur fyrir.“

Guðmundur lætur fylgja með í færslunni tengil á söfnunina fyrir útförinni á vefsvæðinu gofundme.com.