Niðurstöður rannsókna hjá embætti sóttvarnalæknis hafa sýnt að nóróveira olli veikindum um eitt hundrað gesta íslensku Hamborgarafabrikkunnar í síðustu viku. Talið hafði verið að um bakteríusýkingu hefði verið að ræða en nú hefur hið sanna komið í ljós samkvæmt frétt RÚV.
Í síðustu viku var greint frá því að veitingastað Hamborgarafabrikkunnar í Kringlunni yrði lokað vegna veikinda gesta og yrði staðurinn hreinsaður hátt og lágt til þess að ganga úr skugga um að ekkert hefði misfarist hjá fyrirtækinu.
„Við viljum tryggja að það sé allt með felldu hjá okkur og velta við öllum steinum,“ segir María Rún Hafliðadóttir, forstjóri Gleðipinna, sem á og rekur Íslensku Hamborgarafabrikkuna. Sýni voru tekin og sendin í rannsókn og vann fyrirtækið í nánu samstarfi við birgja sína og Heilbrigðiseftirlitið.
Málið vatt svo upp á sig þegar í ljós kom að um eitt hundrað gestir höfðu veikst og var veitingastað fyrirtækisins við Höfðatorg einnig lokað. Nú liggur ástæða veikindanna loks fyrir – nóróveira.
Í byrjun júlí kom upp nóróveirusmit á Austurlandi í byrjun júlí og kona á níræðisaldri lést en veiran getur verið hættuleg eldra fólki og þeim sem eru með undirliggjandi sjúkdóma.
