Erlendur ferðamaður lést í alvarlegu umferðarslysi á Snæfellsnesvegi, norðan við Hítará í hádeginu, í dag.
Þetta kemur fram í tilkynningu frá Lögreglunni á Vesturlandi.
Þar rákust saman tvær bifreiðar, húsbíll og jepplingur, sem kom úr gagnstæðum áttum. Sjö erlendir ferðamenn voru í bifreiðunum og var farþegi úr annarri þeirra úrskurðaður látinn á vettvangi. Þrír voru fluttir af vettvangi með þyrlu Landhelgisgæslunnar og þrír með sjúkrabifreið.
Báðar bifreiðar eru ónýtar en Lögreglan á Vesturlandi rannsakar tildrög slyssins.
Slökkvilið, lögregla, sjúkraflutningar, rannsóknarnefnd umferðarslysa og Landhelgisgæsla komu að aðgerðum á vettvangi.
