Bandaríska parið Randy Santel og Katina DeJarnett eru stödd hér á landi, en parið stundar óvenjulega atvinnu, matarát og ferðast þau um heiminn í leit að mataráskorunum á veitingastöðum. DV sagði fyrst miðla frá komu parsins fyrir viku, en þau mættu til landsins á fimmtudag.
Sjá einnig: Atvinnupar í áti leitar að áskorunum á Íslandi
Parið hefur ekki enn birt myndbönd af Íslandsferðinni á YouTube-rásum sínum, en þau hafa birt myndir á Instagram. Þar má sjá að þau fóru í 16 klukkustunda rútuferð um Suðurlandið í gær, þar sem þau tóku sér meðal annars siglingu á Jökulsárlóni. Mæla þau með að fólk heimsæki Ísland hafi það tök á því.
View this post on Instagram
Parið hefur að sjálfsögðu gúffað í sig mat á íslenskri grundu. Í gær voru þau mætt á Gastro Truck þar sem Katina borðaði 3,2 kg á klukkutíma og Randy 3,6 kg á 53 mínútum af hamborgurum og frönskum með kjúklingi og sósu. „Það var mikið af fólki hérna sem að þekkti þau mjög vel. Þau komu hingað og voru alveg með stjörnur í augunum. Núna eru þau bara að gefa út eiginhandaráritanir,“ segir í frétt Mbl.is.
Katina fagnar í dag 32 ára afmæli sínu. Á morgun tekur síðan við mataráskorun á 2 Guys. „Ég hugsa að þetta verði sex borgarar sem verður bara staflað í turn. Svo verða ostafranskar og eitthvað meira meðlæti með þessu,“ segir Hjalti Vignisson eigandi staðarins við Vísi. Hjalti segir að þau muni fá stuttan tímaramma til að klára allan matinn, um tíu til fimmtán mínútur. Eftir þetta verði áskorunin svo í boði á staðnum fyrir þá sem vilja. Ef fólki tekst að klára allan matinn innan ákveðins tíma fái það máltíðina ókeypis.
Frá Íslandi heldur parið síðan til Parísar í Frakklandi þar sem þau munu hitta fjölskyldu Randy og ferðast síðan með henni til Amsterdam í Hollandi, leitar parið að mataráskorun í báðum löndum sem verður þeirra síðasta á þeim stöðum.
