Maður sem varð fyrir hættulegri hnífstungu í nótt er úr lífshættu. Áverkar hans voru samt mjög alvarlegir. Þetta upplýsir Grímur Grímsson, yfirlögregluþjónn hjá Miðlægri rannsóknardeild lögreglunnar, í samtali við DV.

„Ætli það eigi ekki við þetta sem oft er sagt, að líðan mannsins er eftir atvikum,“ segir Grímur.

„Nei, ekki ennþá. Við erum að leita að gerandanum,“ svarar Grímur þeirri spurningu hvort árásarmaðurinn sé fundinn. Hann gefur ekki upp hvort lögreglan hafi einhvern grunaðan né hvort árásarvopn hafi fundist.

„Málið kom upp stuttu eftir klukkan eitt í nótt,“ segir Grímur, en árásin átti sér stað utandyra á Laugavegi. „Við erum bæði að leita að vitnum og það voru einhver vitni á staðnum sem hefur verið talað við.“

Grímur segir að ástand brotaþolans sé þannig að lögregla geti fljótlega farið að ræða við hann.

Þess má geta að á undanförnum vikum og mánuðum hafa komið upp fjölmörg árásarmál þar sem hnífi var beitt. Tvö eru rannsökuð sem morðmál, annað kom upp á 17. júní en hitt á sumardaginn fyrsta. Einnig er til rannsóknar andlát manns sem varð fyrir höggi inni á skemmtistaðnum LÚX fyrir skömmu. Um síðustu helgi var síðan 17 ára unglingur handtekinn vegna hættulegrar árásar með eggvopni.