Þann 30. júní næstkomandi verður þingfest fyrir Héraðsdómi Norðurlands vestra, á Sauðárkróki, mál sem héraðssaksóknari hefur höfðað gegn karlmanni fyrir alvarleg kynferðisbrot gegn barni.

DV hefur nafnhreinsaða ákæru héraðssaksóknara í málinu undir höndum en þar er maðurinn sakaður um nauðgun og kynferðisbrot gegn barni með því að hafa ítrekað haft samræði og önnur kynferðisbrot gegn stúlku án hennar samþykkis í bílum sem maðurinn hafði til umráða. Segir að maðurinn hafi nýtt sér yfirburðastöðu sína gagnvart stúlkunni, sem og þá staðreynd að hún var ein með honum, fjarri öðrum. Hann hafi látið hana hafa við sig munnmök og sett fingur í leggöng hennar. Þetta hafi hann gert í tveimur bílum sem hann hafði til umráða. Hann hafi ennfremur haft samfarir við hana í bílunum að jafnaði einu sinni í viku. Einnig er hann sagður hafa haft tvisvar samræði við stúlkuna á heimili sínu.

Maðurinn er einnig ákærður fyrir vörslu á barnaníðsefni, með því að hafa haft í vörslu sinni kynferðislega ljósmynd af stúlkunni í síma sínum.

Héraðssaksóknari krefst þess að maðurinn verði dæmdur til refsingar og greiðslu alls sakarkostnaðar.

Fyrir hönd stúlkunnar er gerð krafa um miskabætur upp á rétt rúmlega fimm milljónir króna.