Kallað hefur verið eftir því að ferðamaður sem skar út nöfn í einn veggja Colosseum, hringleikahússins sögufræga í Róm, verði fundinn og handtekinn.

Mirror segir frá því að athæfið hafi náðst á myndband. Um hafi verið að ræða karlmann sem notaðist við lykla. Maðurinn sem tók myndbandið deildi því á vefsvæðið Reddit.

Á myndbandinu heyrist sá sem tók það upp spyrja hinn skurðglaða ferðamann hvort hann ætlaði í alvöru að halda athæfinu áfram. Maðurinn með lyklana lét sér fátt um finnast og hélt ótrauður áfram.

Þess má geta að Colosseum er um 2000 ára gamalt.

Óljóst er á þessari stundu hvaða nöfn maðurinn skar í vegg byggingarinnar ómetanlegu en talið er víst að hann hafi skorið sitt eigið nafn og nafn kærustu sinnar.

Maðurinn hefur ekki verið nafngreindur en er kallaður öllum illum nöfnum á Reddit.

Aðilinn sem tók myndbandið og birti það á Reddit segist hafa tilkynnt athæfið til starfsmanna á svæðinu en þeir hafi látið sér fátt um finnast og virst vera sama þótt slíkt skemmdarverk væri unnið. Hann segist hafa bent starfsmönnunum á manninn en þeir hafi sagst hafa látið lögreglu vita en ekki sýnt því áhuga að fá myndbandið.

Annar einstaklingur sem segist hafa orðið vitni að athæfinu segir að sá skurðglaði hafi ekki virst telja sig vera að gera neitt rangt.

Ef leitað verður að manninum og hann kærður gæti há sekt beðið hans.

Fordæmi voru fyrir því að ferðamenn hafi skorið út orð í veggi Colosseum. Árið 2014 var ferðamaður sektaður um andvirði um þriggja milljóna íslenskra fyrir að skera upphafsstafi sína í einn veggjanna. Ári seinna voru tvær konur handteknar fyrir sams konar athæfi og ákærðar fyrir skemmdarverk á sögulegum minjum. Það fylgir þó ekki frétt Mirror hverjar lyktir þess máls urðu.