Samkvæmt heimildum DV var maður sem lést í gær eftir átök á skemmtistað í miðborg Reykjavíkur á aðfaranótt laugardags sleginn einu höggi í höfuðið, líklega í hnakka. Er þetta haft eftir sjónarvottum. Lögregla er ekki tilbúin að staðfesta þessa lýsingu á þessu stigi málsins. Hinn grunaði er 28 ára gamall og æfir hnefaleika. Hefur hann verið úrskurðaður í gæsluvarðhald til 29. júní á grundvelli rannsóknarhagsmuna. Maðurinn er íslenskur.
Lögregla fékk tilkynningu um árásina á fjórða tímanum á föstudagsnóttina. Er lögreglumenn komu á skemmtistaðinn var hinn grunaði farinn en hann var handtekinn skammt frá stuttu síðar. Árásarþolinn var þá þungt haldinn en hann lá á gjörgæsludeild Landspítalans þar sem hann lést í gær. Hinn látni er á þrítugsaldri.
Grímur Grímsson, yfirlögregluþjónn hjá Miðlægri rannsóknardeild Lögreglunnar á höfuðborgarsvæðinu, staðfestir að hinn grunaði hafi verið yfirheyrður en getur ekkert úttalað sig um innihald framburðar hans. Grímur segir aðspurður að ekki sé grunur um á þessu stigi að vopni hafi verið beitt. Ennfremur er ekki talið að aðrir en þessir tveir hafi tekið þátt í átökunum, en ekki sé hægt að staðfesta það.
„Rannsókn þessa máls er bara svo stutt á veg komin að við erum enn að reyna að átta okkur á hvað gerðist,“ segir Grímur.
Eiríkur Valberg lögreglufulltrúi staðfestir að skýrslur hafi verið teknar af nokkrum vitnum á skemmtistaðnum. „Það hafa verið teknar skýrslur af nokkrum vitnum sem voru á staðnum.“ Segir hann framburð þeirra hafa skýrt atburðarásina að einhverju leyti. „Við erum samt sem áður ennþá að ná almennilega utan um atburðarásina,“ segir Eiríkur.
Aðspurður um hvort áverkar hafi verið á hinum grunaða segir Eiríkur: „Það er ekki tímabært að fara út í áverkamyndina núna.“ Hann staðfestir það sem Grímur segir, að ekki sé grunur um að vopnum hafi verið beitt.
Eiríkur segir að hinn grunaði hafi verið yfirheyrður og hafi verið samvinnuþýður. Aðspurður segir Eiríkur að myndin af atburðarásinni sé að skýrast en nokkuð vanti upp á ennþá. „Hún er að skýrast töluvert mikið.“
Eiríkur segist telja að von sé á tilkynningu frá lögreglu um málið næst á morgun, en tæpast í dag.
Vísir greinir frá því að hinn látni hafi verið frá Litháen. Lögreglu telur ekki margt benda til þess að tenging hafi verið milli mannanna.
