„Það er óvænt fyrir Söngskólann í Reykjavík að vera kominn í þessa stöðu. Við erum vanari að glíma við tónstiga en málaskak fyrir dómstólum,“ segir Garðar Thór Cortes, aðstoðarskólastjóri Söngskólans í Reykjavík, í stuttu spjalli við DV. Skólinn hefur stefnt byggingaverktakafyrirtækinu Snorrabragur vegna meintra vanefnda á greiðslum vegna fasteignaviðskipta. Telja forsvarsmenn hjá Söngskólanum að hann eigi inni rúmlega 142 milljónir króna hjá byggingaverktakanum.
Málavextir eru í sem stystu máli þeir að árið 2016 seldi Söngskólinn í Reykjavík fasteign í eigu sinni, að Snorrabraut 54, til Snorrabrags. Í kaupsamningi sem gerður var milli aðila í lok árs 2016 var kveðið á um að Sönskólinn tæki eignina á leigu af nýja eigandanum og skyldi leiga ekki vera greidd heldur dragast frá kaupverði. Einnig var kveðið á um það að Snorrabragur skyldi greiða Söngskólanum 50 þúsund krónur fyrir hvern viðbótarfermetra sem samþykki fengist fyrir hjá yfirvöldum til að nýta til bygginga á lóðinni.
Snorrabragur hafði áform um að byggja hótel á umræddum byggingarreit en ekki fékkst leyfi til þeirrar byggingar en árið 2022 hóf félagið byggingu íbúðarhúsnæðis á svæðinu.
Söngskólinn telur sig eiga inni háar fjárhæðir hjá Snorrabrag vegna aukins byggingarmagns á reitnum sem félagið hafi hagnýtt sér. Til frádráttar kemur fyrri byggingarréttur og húsaleiga í 14 mánuði en niðurstaðan er krafa upp á 142.710.000 krónur. Viðræður milli aðila um málið hafa ekki skilað niðurstöðu og því hefur Söngsskólinn stefnt Snorrabrag.
Aðila greinir mjög á í málinu en Snorrabragur telur t.d. að samkomulagið hafi verið skilyrt af leyfi til hótelbyggingar sem ekki hafi fengist. Þessu hafnar Söngskólinn. Ennfremur telur Snorrabragur að dragast eigi frá innviðagjald sem borgin hafi lagt á fyrirtækið en Söngskólinn hafnar því. Þá bendir Snorrabragur á að félagið hafi selt fasteignina til félagsins Snorrabraut 54 og því eigi að beina kröfunni þangað en ekki á Snorrabrag.
Fyrirtaka var í málinu við Héraðsdóm Reykjavíkur þann 20. júní síðastliðinn og lögðu málsaðilar þá fram stefnu og greinargerð. Óvíst er hvenær aðalmeðferð verður í málinu.
„Það var ekki annar valkostur í boði þar sem ekkert hafi fengist greitt þrátt fyrir að byggingarrétturinn hafi fengist samþykktur og verkið selt í framhaldinu með hagnaði þrátt fyrir að ekki hafi verið gert upp við Söngskólann,“ segir Garðar ennfremur en miklir hagsmunir eru í húfi fyrir skólann. „Rekstur skólans er í járnum eins og hjá mörgum öðrum tónlistarskólum og okkur myndi sannarlega muna um þessa fjármuni sem samið var um á sínum tíma að við ættum að fá.“
