Í nýrri frétt CNN segir frá því að Hunter Biden, sonur Joe Biden forseta Bandaríkjanna, muni játa sig sekan um brot á skattalögum samkvæmt samkomulagi við alríkissaksóknara og hafi einnig gert annað samkomulag vegna kæru um brot á vopnalögum. Þetta kemur fram í skjölum sem dómsmálaráðuneyti Bandaríkjanna hefur lagt fyrir alríkisdómstól í Delaware-ríki.
Vopnalagaákæran er til komin vegna þess að þáverandi kærasta Biden henti skotvopni sem skráð var á hann í ruslagám í Wilmington í Delaware árið 2018. Hann hefur viðurkennt að glíma við eiturlyfjafíkn og samkvæmt bandarískum alríkislögum er fíklum bannað að eiga skotvopn og töldu saksóknarar mögulegt að Biden hefði logið þegar hann keypti vopnið sem endaði í ruslagáminum
Mun ráðuneytið samkvæmt samkomulaginu, vegna brota á skattalögum, við Hunter Biden mæla með því við dómara að hann hljóti skilorðsbundinn dóm fyrir að greiða ekki skatta á réttum tíma vegna tekna á árunum 2017 og 2018.
CNN telur víst að þetta mál muni hafa áhrif á kosningabaráttuna vegna forsetakosninganna á næsta ári. Repúblikanar hafa þegar gagnrýnt stjórn Biden og dómsmálaráðuneytið fyrir samkomulagið í ljósi ákæru á hendur Donald Trump, fyrrverandi Bandaríkjaforseta, vegna meintrar glæpsamlegrar meðferðar á leyniskjölum sem varða þjóðaröryggi Bandaríkjanna.
Hunter Biden var um tíma til rannsóknar hjá dómsmálaráðuneytinu vegna ásakana um m.a. peningaþvætti og að hafa stundað ólöglega hagsmunagæslu fyrir erlenda aðila. Lögmaður hans segir að samkomulagið feli í sér að nú muni langvarandi rannsókn ráðuneytisins á hendur Hunter Biden ljúka. Skjólstæðingur hans vilji axla ábyrgð vegna slæmra ákvarðanna sem hann tók í glímu sinni við fíknisjúkdóm.
Í yfirlýsingu Joe Biden, forseta Bandaríkjanna og föður Hunter, og eiginkonu hans, forsetafrúarinnar og stjúpmóður Hunter, Jill Biden segir að þau elski son sinn og styðji hann við að byggja upp nýtt líf. Þau muni ekki tjá sig frekar um málið.
Donald Trump gagnrýnir samkomulagið harðlega og segir spillt dómsmálaráðuneyti Joe Biden hafa veitt Hunter allt of væga refsingu, í raun ígildi stöðumælasektar. Bandaríkst réttarkerfi virkaði ekki.
