Slys varð á ferðmanni í Námskarði, ekki langt frá Mývatni, á laugardag. Unglingsdrengur sem er farþegi með erlendu skemmtiferðaskipi brenndist þá á fæti en mikill jarðhiti er á svæðinu.

Aðilar sem tengjast málinu hafa óskað nafnleyndar en fyrir liggur að leiðsögumaður kom drengnum til hjálpar rétt eftir brunann. Enginn varð vitni að atvikinu sjálfu en drengurinn náði sambandi við leiðsögumann strax eftir það. Drengurinn taldi sig hafa farið of nálægt jarðhitanum en ekki liggur fyrir hvort hann fór yfir markaða línu. Leiðsögumaðurinn veitti drengnum skyndihjálp á staðnum, síðan var keypt fyrir hann frosið grænmeti til að kæla brunasvæðið og honum var síðan ekið rakleiðis út í skip þar sem læknar hlúðu frekar að honum. Er hann talinn hafa fengið annars stigs bruna eða vægari.

Sannir landvættir sjá um rekstur svæðisins og DV náði sambandi við Þórólf Gunnarsson sem er í forsvari fyrir fyrirtækið. Hann hafði ekki fengið upplýsingar umrætt atvik en sagði að brunaslys á svæðinu skiptu tugum árlega. „Þetta svæði er í grunninn mjög hættulegt. Við vorum að staðfesta kaup á nýju göngustígakerfi til að setja upp þarna, til að ná fólki út úr þessu leirsvæði sem hefur verið til vandræða til áratuga,“ segir Þórólfur.

Þórólfur segir ekki útilokað að hægt sé að brennast á svæðinu án þess að stíga inn fyrir markaðar línur. „En ef fólk fer yfir kaðlamarkanir og merkingar þá pompar það í gegnum leirlagið. Leirsvæðið þarna er síbreytilegt og svæði sem er hættulegt núna getur verið öðruvísi eftir hálfan mánuð. Þetta svæði er í sífelldri hreyfingu og þesss vegna erum við að láta gera þetta göngustígakerfi og það er grundvöllurinn fyrir því hvers vegna gjaldtaka hófst þarna, en markmikið er að taka fólk 100 prósent út úr leirnum sem er á svæðinu.“

„Allir sem eru í ferðaþjónustu þarna í um 200 kílómetra radíus hafa lent í þessum leir, þetta er eins og tyggjó og það hafa verið valin sérstök teppi inn í hótel og bíla til að geta þrifið þennan leir,“ segir Þórólfur ennfremur. Hann segir að það taki um viku að setja upp göngustígakerfið en það sé enn í smíðum og verður ekki sett upp fyrr en það er fullsmíðað.