Klukkan 23 í kvöld, mánudaginn 15. maí, hefjast götulokanir í miðbænum vegna Leiðtogafundar Evrópuráðsins sem stendur yfir í Hörpu á þriðjudag og miðvikudag. Svæðið í kringum Hörpu verður lokað fyrir allri umferð en hluti Sæbrautar, Kvosin, Lækjargata, Fríkirkjuvegur, Laufásvegur og Skothúsvegur verða lokaðar fyrir umferð bíla og rafhlaupahjóla en opnar fyrir gangandi og hjólandi umferð. Strætisvagnar munu ekki aka um lokaðar götur.

Þó að boðaðar lokanir hefjist í kvöld hafa frá því fyrir helgi verið í gangi einhverjar lokanir á milli Þingholta og kvosarinnar og hafa verið settir upp vegartálmar í nokkrum götum.

Búast má við tímabundnum umferðarteppum á Reykjanesbrautinni, milli Suðurnesja og höfuðborgarsvæðisins, vegna fylgdaraksturs með þjóðarleiðtogum, og af sömu ástæðum má búast tímabundið við hægari umferð um allt höfuðborgarsvæðið en vanalega. Er ökumönnum ráðlagt að áætla lengri ferðatíma en vanalega af þessum ástæðum. Þjóðarleiðtogarnir sem sækja fundinn koma með einkaflugi og lenda ýmist á Keflavíkurflugvelli eða Reykjavíkurflugvelli.

Lokanirnar hefjast, sem fyrr segir, í kvöld kl. 23, og þeim verður aflétt kl. 18 á miðvikudag. „Þó ber að hafa í huga að einhverjar truflanir verða á umferð og jafnvel styttri lokanir á götum eða akreinum frá laugardeginum 13. maí til fimmtudags 18. maí þegar verið er að setja upp lokunarbúnað og taka hann niður,“ segir á vef Stjórnarráðs Íslands.