Lögmaður hefur verið kærður til lögreglunnar á höfuðborgarsvæðinu fyrir nauðgun og önnur kynferðisbrot gagnvart eiginkonu skjólstæðings síns. Vísir greinir frá þessu en umræddur lögmaður er með málsflutningsréttindi fyrir Landsrétti. Fram kemur að hin meintu brot lögmannsins eru sögð hafa átt sér stað á meðan skjólstæðingur hans var í einangrun á Hólmsheiði.
Lögmaðurinn er meðal annars sakaður um að hafa brotið á eiginkonunni á geðdeild Landspítalans þar hafði hún verið lögð inn skömmu eftir gæsluvarðhalds úrskurð eiginmannsins.
Vegna lögmannsstarfsins er málið í flýtimeðferð samkvæmt heimildum fréttastofu Vísis. Fram kemur að lögmaðurinn hafi viðurkennt í skýrslutöku hjá lögreglu að hafa haft samfarir við konuna „fimm til tíu sinnum“ en neiti því alfarið að hafa nauðgað konunni. Um hafi verið að ræða framhjáhald með samþykki beggja aðila.
Í umfjöllun Vísis kemur fram að fréttastofan hafi undir höndum ýmis gögn sem styðja frásögn konunnar. Meðal annars vottorð sálfræðings frá Áfalla- og sálfræðimiðstöðinni, ásamt vottorði frá Stígamótum sem segir að konan hafi sótt ráðgjöf og lýst því að „hún sé að fást við fjölmargar og alvarlegar afleiðingar sem eru algengar eftir kynferðisofbeldi.“
