Úkraínumenn hafa staðið í ströngu síðan í febrúar á síðasta ári við að verjast rússneska innrásarhernum. En það kom ekki í veg fyrir að síðasta haust íhuguðu þeir af alvöru að ráðast á rússneska hermenn í Sýrlandi en þar hafa Rússar verið með hermenn síðan 2015 til að styðja Bashar al-Assad forseta.

Þetta kemur fram í bandarískum leyniskjölum sem var nýlega lekið á netið. Fram kemur að GUR, leyniþjónusta úkraínska hersins, hafi gert áætlanir um hvernig væri hægt að gera leynilegar árásir á rússneska hermenn í Sýrlandi. The Washington Post skýrir frá þessu.

Markmiðið með þessu var að valda Rússum svo miklu tjóni í Sýrlandi að þeir myndu neyðast til að flytja hermenn frá Úkraínu til Sýrlands.

The Washington Post segir að í desember hafi Volodymyr Zelenskyy, forseti, fyrirskipað leyniþjónustunni að hætta við þessa áætlun.