Þann fimmta maí næstkomandi verður aðalmeðferð við Héraðsdóm Reykjavíku í máli yfir fimm mönnum sem ákærðir eru fyrir peningafölsun og fjársvik í janúar árið 2021. Mennirnir greiddu fyrir vörur og þjónustu með vel fölsuðum evruseðlum og fengu gefið til baka í íslenskum krónum. Í flestum tilvikum fengu mennirnir greitt til baka nokkra þúsundkalla eða tugi þúsunda en í einni verslunarferðinni tókst þeim að fá borgað til baka yfir eina milljón króna.

Í nafnhreinsaðri ákæru héraðssaksóknara í málinu segir á einum stað:

„Á hendur x, y og z með því að hafa í kringum miðnætti dagana d 2020, í félagi og í blekkingarskyni, afhent starfsmanni samtals 35 stykki af fölsuðum 100 evru seðlum og 22 stykki af fölsuðum 200 evru seðlum h og fengið afhent til baka samtals 1.084.828 krónur.“

Lögregla gaf út tilkynningu um málið fyrir meira en þremur árum. Þar sagði að svo virtist sem mennirnir hafi keypt búnt af fölsuðum evruseðlum í Rússlandi:

„Um helgina tókst svindlurum að koma nokkuð af evruseðlum í umferð. Aðferðin sem að þeir beittu var að fara með háa seðla, 100 og 200 Evrur og versla lítið eitt með þeim. Þeir herjuðu einna helst á sólarhringsverslanir, leiktækjasali og leigubíla. Þetta var hópur sem fór víða.

Svindlararnir fóru stuttar ferðir með leigubílum eða keyptu sígarettur og smávörur en fengu svo afgang í íslenskum krónum. Þannig tókst þeim að verða sér úti um talsverða peninga.

Fljótt á litið eru þetta sambærilegir seðlar evrum. En þeir standast enga nánari skoðun ef menn vita að hverju á að leita. Svo virðist sem að svindlararnir hafi verið með búnt af fölskum seðlum sem hægt er að kaupa í Rússlandi.“

Sem fyrr segir verður aðalmeðferð í málinu snemma í maí en málið kom upp fyrir meira en þremur árum.