Frétt DV um ástandið í Seljahlíð vakti athygli. Seljahlíð er í Hjallaseli í Breiðholti en þar er rekið öldrunarheimili og þjónustukjarni. Aldraðir íbúar í húsinu hafa orðið fyrir ónæði og áreiti af sumum yngri íbúum hússins sem eiga við fíknivanda að stríða.

Sagt er að aldraðir íbúar þurfi stundum að flýja matsalinn í Seljahlíð vegna hávaða og ógnandi hegðunar af hálfu yngri íbúanna. Maður sem þarna býr hefur margoft sýnt af sér ógnandi hegðun í hverfinu og verið á ferðinni með barefli, brotið rúður í bílum og komið inn á hjúkrunarheimilið með þýfi og stolin reiðhjól.

Þessi blöndun á íbúum, óreglufólki og öldruðum, sætir gagnrýni. Þykir einnig sérkennilegt að reykingar eru leyfðar á herbergjum og eru nokkrir íbúar sagðir reykja í herbergjum sínum.

Samkvæmt heimildum DV hafa nágrannar Seljahlíðar orðið fyrir ógnunum og áreiti af hendi eins íbúa í Seljahlíð. Þegar verst lætur hótar hann þeim lífláti.

Rannveig Einarsdóttir, sviðsstjóri Velferðarsviðs Reykjavíkurborgar, hefur svarað fyrirspurn DV um málið. Í svari hennar segir:

„Félagsbústaðir eiga Seljahlíð en velferðarsvið sér alfarið um reksturinn þar, annars vegar á 20 hjúkrunarrýmum og hins vegar á þjónustuíbúðum fyrir fólk í viðkvæmri stöðu, einkum eldra fólk.

Við getum staðfest að upp hafa komið mál þar sem einstaklingar hafa sýnt af sér truflandi hegðun í Seljahlíð. Við getum hins vegar ekki tjáð okkur um samskipti einstakra íbúa, sem búa þarna í sjálfstæðri búsetu í leiguhúsnæði.

Reykjavíkurborg hefur sagt upp samningi við Sjúkratryggingar Íslands um rekstur hjúkrunarrýmanna í samræmi við ákvörðun borgarstjórnar frá 6. desember sl. og hyggur á frekari þróun þjónustu í húsnæðinu, einkum fyrir eldra fólk.“

Rannveig bendir á að ekki sé rétt með farið um eitt atriði í fyrri frétt DV um ástandið í Seljahlíð. Þar sagði að Félagsbústaðir rækju bar í fjáröflungarskyni á staðnum. Það mun ekki vera rétt. Ennfremur var greint frá áhyggjum af reykingum heimilisfólks á herbergjum sínum:

„Tvö atriði varðandi fréttaflutning þinn af málefnum Seljahlíðar: Félagsbústaðir koma ekki að rekstrinum og því ekki rétt að þeir reki þar bar í fjáröflunarskyni. Fólki er heimilt að reykja á heimilum sínum. Velferðarsvið getur því ekki bannað reykingar fólks í heimahúsum.“