Kona ein segist hafa greitt smið einum, sem býr í Grafarvogi, 420 þúsund krónur í efniskostnað, en hann hafi síðan hvorki unnið verkið sem hún réð hann til né endurgreitt henni féð.

Konan segist í samtali við DV hafa reynt að fá lögfræðing í málið. Sá hafi sent kröfubréf í tölvupósti til smiðsins en fengið það svar til baka að þetta væri ekki netfang smiðsins. „Þetta kostaði mig 55 þúsund krónur,“ segir konan en hún hefur ítrekað freistað þess að kæra manninn til lögreglu fyrir fjársvik en lögregla hefur hafnað að taka við kæru og segir þetta vera einkamál.

Rætt er um málið í stórum Facebook-hópi og þar varað við því að greiða iðnaðarmönnum fyrirfram vegna efniskostnaðar. Eðlilegast sé að þeir leggi sjálfir út fyrir slíkum kostnaði og rukki eftir á um leið og þeir rukka fyrir vinnuna. Maður einn segist hafa unnið fyrir þennan smið og lagt út fyrir efniskostnaði en hann hafi ekki fengið neitt greitt. Segir hann að tugi aðfarabeiðna hafi verið gefnar út á manninn. Umrædd kona segir þar um þennan smið:

„Hann stelur af fólki. Segist taka að sér verkefni, og þarf fólk að borga fyrirfram. Svo lætur hann sig hverfa. Hann tók að sér verkefni hjá mér, ég lagði inn á hann 16. janúar 2021 420þ. hann sagði að þetta væri fyrir efniðskostnað. Hann hefur ekki látið sjá sig,svarar ekki pósti eða síma .Hann er drullusokkur. Er komin með lögfræðing. Ég veit að það eru margir búnir að lenda í honum, og hafa ekki fengið borgað eða hann hafi gert þau verkefni sem hann hafi lofað.Hvernig ætli skattaskýslan liti út hjá honum.“

DV reyndi að hafa samband við smiðinn en hann svaraði ekki í síma. Þess skal getið að DV hefur ekki skrifleg gögn um athæfi mannsins og ekki sannanir fyrir því að honum hafi verið stefnt vegna svika eða skulda.