Sverrir Þór Gunnarsson, betur þekktur sem Sveddi tönn, var í gær handtekinn í umfangsmiklum aðgerðum í Brasilíu, en hann er grunaður um að vera einn af höfuðpaurunum í stórum glæpasamtökum sem leggja stund á fíkniefnasmygl og peningaþvætti. Gæti Sveddi átt yfir höfði sér allt að 40 ára fangelsi.
Sveddi var hins vegar dæmdur í 22 ára fangelsi í Brasilíu árið 2012 en ekki er á hreinu hvers vegna hann gekk laus. Aðgerðin var unnin í samstarfi við Ítalíu í gegnum Interpol og við Ísland í gegnum Europol og voru fulltrúar frá íslensku lögreglunni viðstaddir aðgerðir í gær. Aðgerðin gengur undir nafninu „Match point“.
Greina brasilískir fjölmiðlar frá því að Sverrir Þór hafi verið handtekinn af alríkislögreglunni í húsi á byggingarstigi í São Conrado í suðurhluta Rio de Janeiro. Samkvæmt „Match point“ aðgerðinni var Sverrir Þór aðalskotmark aðgerðanna í gær og er talinn vera einn af höfuðpaurum glæpasamtakanna.
Lögreglufulltrúinn Nelson Luiz Napp sagði í samtali við miðilinn Band að upplýsingar sem fengust úr flugskýli á flugvelli á Porto Belo hafi komið lögreglu á sporið og í kjölfarið hafi rannsókn leitt í ljós umfangsmikla skipulagða glæpastarfsemi sem fólst einkum í peningaþvætti sem var stundað með kaupum á eignum sem og byggingarframkvæmdum.
„Aðgerðin byggðist einnig á alþjóðlegri samvinnu við Ítalíu í gegnum Interpol, við Ísland í gegnum skrifstofur Europol, sagði lögreglufulltrúinn Aletea Vega Marona Kunde sem greindi frá því að fulltrúar frá íslensku lögreglunni hafi verið viðstaddir aðgerðina.
„Þessi glæpasamtök eru afar sérkennileg því þau selja allskonar fíkniefni, bæði í litlu og miklu magni. Þau flytja líka eiturlyf bæði inn og út úr landi, hass, kannabis, kókaín. Þau flytja á sjó með seglskipum sem koma frá Evrópu sem ferja hassið til stranda Afríku og og fara frá landi frá norðausturhluta Brasilíu. Þetta er gífurlega umfangsmikil starfsemi,“ sagði Nelson Luiz.
Nelson Luiz greindi einnig frá því að samtökin notist við burðardýr til að flytja minna magn fíkniefna, á borð við 3 kíló af kókaíni, til Evrópu en eins séu stærri sendingar ferjaðar með flugvélum eða skipum til Evrópu og svo einnig til Úrúgvæ.
Nelson Luiz sagði að flestir þeir sem handteknir voru í aðgerðunum í gær hafi áður komist í kast við lögin.
„Allir höfðu þeir áratuga reynslu af slíkri starfsemi og margir þeirra voru með fölsuð persónuskilríki“
Samtökin hafi skipst í tvær deildir og er Sverrir Þór talinn hafa stýrt annarri þeirra og er ítalskur karlmaður grunaður um að hafa verið yfir hinni.
Hafi vopn og skotfæri fundist í húsinu þar sem Sverrir Þór var handtekinn.
Eins greina brasilískir miðlar frá því að þeir glæpamenn sem hafa verið handteknir hafi haft í sínum fórum lúxusbifreiðar, seglbáta, glæsihýsi, skartgripi og mikið reiðufé.
Í neðangreindu myndbandi má sjá Svedda tönn leiddan burt í járnum af lögreglu.
