Samkeppniseftirlitið gerði í dag sátt við Arion banka þar sem bankinn gengst við því að hafa brotið gegn banni við uppgreiðslugjöldum á lánum til lítilla fyrirtækja. Mun Arion greiða 80 milljónir í sekt vegna málsins.

Þetta kemur fram í tilkynningu frá Samkeppniseftirlitinu.

Forsögu málsins má rekja til þess að árið 2017 gerði Arion sátt við Samkeppniseftirlitið vegna rannsóknar sem eftirlitið hóf eftir að kvörtun barst frá smærri keppinaut. Með þeirri sátt skuldbatt Arion sig meðal annars til þess að leggja ekki uppgreiðslugjöld á umframgreiðslur skuldara inn á ný og útistandandi lán einstaklinga og lítilla fyrirtækja sem bera breytilega vexti, óháð því undir hvaða lögum viðkomandi lán voru upphaflega veitt.

Bankinn hefur nú viðurkennt að hafa brotið að hafa brotið gegn þessari sátt hvað varðar bann við uppgreiðslugjöldum á lánum til lítilla fyrirtækja sem bera breytilega vexti í tilteknum afmörkuðum tilvikum. Bankinn hafði í níu lánssamningum sem bera breytilega vexti kveðið á um uppgreiðslugjald eða ígildi þess og hafði bankinn innheimt slíkt gjald í einu af þessum níu tilvikum.

Arion viðurkenndi einnig að betur hefði mátt standa að upplýsingagjöf til viðskiptavina vegna áðurnefndrar sáttar frá árinu 2017 og báru verðskrár bankans ekki með sér að áðurnefnt bann við uppgreiðslugjöldum væri í gildi. Auk þess var hlutaðeigandi lántakendum ekki gerð sérstök grein fyrir áhrifum sáttarinnar á lánaskilmála þeirra.

Segir enn fremur í tilkynningu:

„Eins og framar greinir greiðir bankinn 80 milljónir í sekt vegna málsins. Það hefur verulega þýðingu við mat á fjárhæð sekta að Arion banki hefur sýnt ríkan samstarfsvilja og hefur það stytt rannsókn og málsmeðferð Samkeppniseftirlitsins. Jafnframt er litið til þess að þegar Samkeppniseftirlitið hóf athugun á háttseminni, greip bankinn fljótt til aðgerða svo áhrif hennar yrðu lágmörkuð. Auk þess hefur bankinn gripið til ýmissa aðgerða í því skyni að tryggja traustari framfylgni við 2. gr. sáttarinnar eftirleiðis.“