Héraðsdómarinn Barbara Björnsdóttir hefur kært Margréti Friðriksdóttur, ritstjóra Fréttin.is, fyrir meiðyrði. Þetta staðfestir Margrét í samtali við DV en hún var yfirheyrð af lögreglu í fyrradag vegna málsins.

Forsagan er sú að í febrúar síðastliðinum dæmdi Barbara Margréti seka í Héraðsdómi Reykjavíkur fyrir lífslátshótun gegn Semu Erlu Serdar, baráttukonu og stofnanda hjálparsamtakanna Solaris. Var Margrét dæmd til 30 daga skilorðsbundinnar fangelsisvistar og að greiða lögmanni sínum, Arnari Þóri Jónssyni, um milljón í málsvarnarlaun.

Margrét, sem hefur áfrýjað dómnum til Landsréttar, tók niðurstöðunni óstinnt upp þar og skrifaði færslu á Facebook-síðu sína þar sem hún fór ófögrum orðum um Barböru og vísaði meðal annars í kjaftasögu um ástarlíf hennar. Kallaði hún Barböru meðal annars „lausláta mellu“ auk fleiri ókvæðisorða.

Þá endurtók hún gífuryrðið í vikunni á Facebook-síðu sinni þegar kæran barst henni, en hún hefur nú eytt báðum færslunum.

Árás á tjáningarfrelsi sitt

Margrét segist fullviss um að umrædd saga sé sönn og að hún líti á kæruna sem árás á tjáningarfrelsi sitt.

„Hún er að kæra mig fyrir að tjá mig um ástarsamband hennar. Hvað varð um tjáningarfrelsið, er það bara ætlað sumum? Við skulum ekki gleyma að þetta sama fólk sýknaði Sindra fyrir að kalla Ingó veðurguð barnaríðing og barnaníðing og þar var vísað til tjáningafrelsis. Það er mín skoðun að gift kona sem er óheiðarleg í einkalífi sínu sé ekki með siðferði og dómgreind til að gegna embætti dómara,“ segir Margrét í samtali við DV.

Bendir hún meðal annars á að orðið „mella“ þýði meðal annars, samkvæmt orðabókaskilgreiningu, lauslát kona og því hafi hún verið í fullum rétti að láta hin þungu orð falla.

Hyggst kæra hakkara til lögreglu

Margrét stendur í hörðum slag á fleiri vígsstöðum því eins og DV greindi frá í gær braust óprúttinn hakkari inn í ritstjórnarkerfi miðils hennar og olli þar miklum usla. Síðan lá niðri um tíma en Margréti tókst að koma henni í loftið aftur þökk sé þeirri fyrirhyggjusemi að eiga afrit af öllum gögnum. Hún segir þó að um sjöttu netárásina á síðuna sé að ræða á skömmum tíma og hún hyggist kæra þá nýjustu til lögreglu.