Samningaviðræður hafa staðið yfir í rúmlega eitt ár án þess að niðurstaða hafi fengist. Þetta getur haft miklar afleiðingar fyrir efnahag nýlendunnar, bæði fyrirtæki og íbúa.
Gíbraltar var eitt af stóru málunum í samningaviðræðunum um útgöngu Breta úr ESB og lokasamningur hefur ekki náðst. Bráðabirgðasamningur er í gildi.
Þegar Bretar yfirgáfu ESB 2020 stóðu íbúar Gíbraltar í raun frammi fyrir því að dregið yrði úr möguleikum þeirra til þess að fara óhindrað yfir landamærin til Spánar. En samningur sem Bretar og Spánverjar gerðu 2020 hefur fram að þessu komið í veg fyrir að umfangsmikið landamæraeftirlits sé viðhaft í höfninni, á flugvellinum og við landamæri Spánar og Gíbraltar.
Markmið núverandi viðræðna er að Gíbraltar verði fastur hluti af hinu landamæralausa Schengensvæði. Það hefur þá í för með sér að flugvöllurinn þar og höfnin verða hluti af ytri landamærum Schengen. Ágreiningur Breta og Spánverja er um hver eigi að sinna gæslu á þessum landamærum.
Financial Times segir að Spánverjar krefjist þess að spænska lögreglan sjái um vegabréfaeftirlit á flugvellinum á Gíbraltar sem og í höfninni. Bretar hafna þessu með öllu og segja að ekki komi til greina að spænskir embættismenn starfi á bresku landsvæði.
Þessar deilur eru angi af aldagömlum deilum ríkjanna um yfirráð yfir Gíbraltar en Bretar hafa verið með svæðið á sínu valdi síðan 1713.
