Kona á miðjum aldri varar konur við perra sem virðist venja komur sínar í Öskuhlíð. 

„Mikið væri gott að geta stoppað þennan mann, því eins og lögreglan sagði við mig í dag þá mun hann án efa gera þetta aftur, þó ekki endilega á þessum sama stað, “segir konan sem birti færslu í tveimur hópum á Facebook í gærkvöldi þar sem hún varar konur við manninum.

Konan var á gangi með hundinn sinn í Öskjuhlíð í gærdag, þegar á móti henni kom maður sem hún sagðist lítið hafa pælt í og hvarf hann henni sjónum. „En þegar ég gekk aðeins lengra sá ég að hann var farinn aðeins út af stígnum og búinn að girða niður um sig og var á fullu að athafna sig, fékk greinilega mikið út úr því að ég skyldi sjá hann (hann starði beint á mig).“

Konan segir að fyrstu viðbrögð hennar hafi verið að hlæja bara, en hún var að tala í símann við vinkonu sína. „Ég fann eftir smá stund að mér leið óþægilega, sneri mér við og sá að hann var aftur kominn á stíginn og horfði á eftir mér,“ segir konan sem hringdi á lögregluna. 

Ræddi hún við lögregluna og gat gefið þokkalega góða lýsingu á manninum, en hann var þá farinn. Að hennar sögn keyrði lögreglan um svæðið en fann manninn ekki. 

„Ef einhverjir aðrir skyldu hafa lent í honum, eða jafnvel séð náunga í dag sem er á bilinu 20-30 ára, í dökkum jogging galla með hettuna uppi, og í hvítum skóm, ca. 1.90 sm á hæð, í nágrenni við Öskjuhlíð.“

Segir konan að lögreglukonan sem hún talaði við hafi verið almennileg og skilningsrík og fundist mjög miður að hafa ekki getað haft upp á manninum.