Nemendur við Moscow Aviation Institute eru komnir í mikla klemmu. Þetta er einn af bestu háskólum Rússland en þar eru meðal annars verkfræðingar, sérhæfðir í flugtækni, geimtækni og flugskeytatækni, menntaðir.

Klemman sem nemendurnir eru komnir í er að nú standa þeir frammi fyrir þeim valkosti að ef þeir ganga ekki til liðs við rússneska herinn, þá fá þeir ekki útskriftarskírteinið sitt.

Sky News skýrir frá þessu og byggir á umfjöllun óháða rússneska miðilsins Vertska.

Vertska segir að útskriftarskírteini verði ekki gefið út fyrr en stúdentarnir hafa skrifað undir herkvaðninguna. Stúdent sagði í samtali við miðilinn að á skrifstofunni, þar sem skrifað er undir herkvaðninguna, sitji fulltrúi hersins.

Stúdentarnir, sem eiga í hlut, hafa stundað nám í háskólanum í fimm og hálft ár og sótt sér sérmenntun. Þeir eru að sögn hluti af áætlun Rússa um kalla mörg þúsund unga menn, frá öllu landinu, í herinn.

Vertska segir að sumir stúdentar hafi hafnað þessu kostaboði um að ganga til liðs við herinn og hafi það kostað þá útskriftarskírteinið.

Orðrómur er á kreiki um að Pútín hyggist kalla 500.000 menn í herinn á næstunni en í september kallaði hann 300.000 menn til herþjónustu. Það hefur ekki dugað til sigurs í Úkraínu og því virðist hann hafa þörf fyrir enn fleiri hermenn til að senda á vígvöllinn.