Heimsóknin er sögð hafa átt sér stað á laugardaginn en Rússar hafa borgina á sínu valdi.
En sumir hafa efasemdir um að Pútín hafi í raun og veru verið í Maríupól. Einn þeirra Flemming Splidsboel, sérfræðingur í rússneskum málefnum hjá Dansk Institut for Internationale Studier, sem lét efasemdir sínar í ljós í samtali við B.T.
„Ég er ekki sannfærður um að hann hafi verið þarna,“ sagði hann og bætti við að það geri þetta grunsamlegt sé að aðeins þetta eina myndband hafi verið birt af þessari meintu ferð Pútíns til Maríupól.
„Það er undarlegt að þeir hafi ekki notað fjölmiðla í botn til að enginn vafi leiki á að hann hafi verið þarna. Hann gæti til dæmis hafa gengið um og talað við fólk,“ sagði Splisboel og bætti við:
„Þetta er athyglisvert miðað við hvernig við sjáum þetta oftast þegar hann heimsækir staði. Til dæmis heimsótti hann nýlega þyrluverksmiðju og þá gat maður sé hann ganga um og skoða hluti og heilsa starfsfólkinu.“
Hann benti einnig á að venjulega myndi heimsókn af þessu tagi vera gerð góð skil í myndum og myndböndum á heimasíðu Kreml.
Hins vegar sé þetta eitthvað undarlegt og Pútín sjáist ekki vel. Það gefi tilefni til vangaveltna um hvort það sé í raun hann sem sést í myndbandinu. „Þetta gæti verið tekið upp hvar sem er, bæði atriðið í bílnum og tónleikasalnum. Venjulegir Rússar eru eflaust sannfærðir en það er ég ekki,“ sagði hann.
